Fylkkagildii leat addon doaimmat ja gaskaoamit ja daid siskkobealde galget ovddidit álbmotdearvvašvuođa. Dát galgá dáhpáhuvvat regionála ovdánahttima ja plánema, hálddašeami ja bálvalusdoaimma, ja doaibmabijuid bokte mat galget dustet álbmotdearvvašvuođahástalusaid.

Fylkkagielda galgá doarjut álbmotdearvvašvuođabarggu gielddain, ja leat láidesteaddjin ovttastit fylkka álbmotdearvvašvuođabarggu.

Fylkkagielddas galgá leat dárbbašlaš oppalašgeahčastat fylkka dearvvašvuođadilis, ja mo positiiva ja negatiiva fáktorat sáhttet dasa váikkuhit.

Loga eanet siiddus "Álbmotdearvvašvuođa oppalašgeahčastat"

Álbmotdearvvašvuođalága birra

Álbmotdearvvašvuođaláhka galgá váikkuhit vai servodatovdáneapmi ovddida álbmotdearvvašvuođa, ja dasa gullá maid dásset sosiála dearvvašvuođaerohusaid. Álbmotdearvvašvuođabargu galgá ovddidit álbmoga dearvvašvuođa, loaktima, buriid sosiála ja biraslaš diliid ja váikkuhit eastadit psyhkalaš ja somáhtalaš buozalmasvuođaid, vaháguhttimiid dahje gillámušaid.

Láhka galgá sihkkarastit ahte gielddat, fylkkagielddat ja stáhtalaš dearvvasvuođaeiseválddit bidjet johtui doaibmabijuid ja oktiiheivehit iežaset doaimma álbmotdearvvašvuođabargguin dohkálaš vuogi mielde. Láhka galgá láhčit vai lea guhkesáiggi ja systemáhtalaš álbmotdearvvašvuođabargu.