Juohkehaš guhte lea váldosisaváldimis ožžon fálaldaga leat SMS bokte ožžon dieđu ahte galget elektrovnnalaš ID:in beassat sisa vigo.no:i ja iskat ja vástidit fálaldaga. Ferte vástidit maŋimusat bearjadaga suoidnemánu 17. beaivvi.

Váldosisaváldin lea gaskal 16 ja 24 jahkásaš nuoraid várás Finnmárkkus ja nuoraide eará fylkkain guđet ohcet nationála linnjáide. 

Eará ohccit, nu go rávesolbmot vuoigatvuođain joatkkaskuvlaohppui dahje sis guhte ii leat vuoigatvuohta, leat mielde nuppi sisaváldimis vahku 30. Dalle sáddet ođđa SMS-dieđu.

Nuorat guhte eai leat vel ožžon fálaldaga váldosisaváldimis galget oažžut fálaldaga ovdal skuvlaálgima čakčat. Sii ožžot ođđa vástádusa nuppi sisaváldimis. 

Sisaváldin fylkkagieldda joatkkaskuvllaide

Fylkkagieldda skuvllaide leat oktiibuot 2359 nuora ožžon skuvlasaji fálaldaga váldosisaváldimis. 1 987 sis ožžo fálaldaga ohppui maid eanemus sávve. Dat lea 84 proseantta buot ohcciin, seammá go diibmá. 

Fylkkagieldda skuvllaide 1 328 ožžo fálaldaga fidnofágalaš oahppoprográmmaide ja 826 studerenráhkkanahtti oahppoprográmmaide. Dasa lassin 146 ohcci ožžo fálaldaga oppalaš studerengelbbolašvuođa lasáhussii ja 59 nuora besse sisa unnitlogugielagiid ráhkkanahttinkursii.

Sisaváldin sámi joatkkaskuvllaide

Fylkkagielda maid gieđahallá sisaváldima Kárášjoga ja Guovdageainnu sámi joatkkaskuvllaide. 

Kárášjoga sámi joatkkaskuvlii leat oktiibuot 92 nuora ožžon skuvlasaji fálaldaga. 68 sis ožžo fálaldaga fidnofágalaš oahppoprográmmaide ja 24 ges studerenráhkkanahtti oahppoprográmmaide. Lohku mii maŋemus namuhuvvui fátmmasta maiddái fálaldaga lasáhusluohkáide (påbygg). 

Guovdageainnu sámi joatkkaskuvlii ja boazodoalloskuvlii oktiibuot 96 nuora ožžo skuvlasaji fálaldaga. 57 sis fidnofágalaš oahppoprográmmaide ja 39 ges studerenráhkkanahtti oahppoprográmmaide. Maŋemus lohku fátmmasta lasáhusluohkáid. 

Muhtin ohccit Finnmárkkus ožžot lassin fálaldaga nationála linnjáide ja fálaldagaid eará fylkkain. 

Dáhkiduvvon skuvlasadji buot nuoraide gaskal 16 ja 24 jagi

Eanáš nuorat Finnmárkkus ožžot skuvlasaji váldosisaváldimis. Nuppi sisaváldimis buot nuorat galget fálaldaga ožžon. 

Rávesolbmot ja eará ohccit ožžot fálaldaga nuppi sisaváldimis jus lea sadji. 

Mii hástit juohkehačča guhte lea fálaldaga ožžon vástidit vigo.no bokte ovdal áigemeari bearjadaga suoidnemánu 17. beaivvi. 

Jearaldagat?

Váldde oktavuođa sisaváldinkantuvrrain inntak@ffk.no bokte, dahje telefonguovddážis tel. 78 96 30 00. Olusat váldet oktavuođa minguin dáid beivviid ja mii bivdit buohkaid leat gierdevaččat. 

Sisaváldinkantuvra ii rievdat mearrádusaid maŋŋá váldosisaváldima suoidnemánu 10. beaivvi. Nuppi sisaváldimis vahku 30 nuorat vuordinlisttus ožžot ođđa vástádusa. Dalle rávesolbmo ohccit ja earát ožžot maid vástádusa. Skuvllat váldet badjelassii sisaváldima vahku 32 ja ohccit sáhttet dalle váldit oktavuođa skuvllain gosa háliidit biddjot vuordinlistui. Lasi dieđuid gávnnat sisaváldinkaleandaris ffk.no:s. 

Ohcci ferte atnit MinID beassat sisa vigo.no:ii. Váldde oktavuođa MinID:in tel 800 30 300 dahje e-poasttas (brukerstotte@digdir.no) jus leat jearaldagat MinID, kodaid ja sullasaččaid birra. Sáhtát maid lohkat sin veahkkesiidduid https://www.norge.no/nb/hjelp-og-kontakt/52.