Du ássangielda dat mearrida oaččut go TT-koartta vai it. Danne galgá ohcan sáddejuvvot du ássangildii áššemeannudeapmái.
Sáhtát ohcat beassat TT-ortnegii miehtá jagi. Ohcan meannuduvvo njealji vahku siste. Koarta lágiduvvo dalán go ohcan lea meannuduvvon ja dohkkehuvvon.
Gielddat dohkkehit ortnega geavaheddjiid doavtterduođaštusa, ohcanskovi ja mearriduvvon vuoruhaneavttuid vuođul.
Geavaheaddjis lea alddis ovddasvástádus dieđihit gielddaide jus dáhpáhuvvet rievdamat main lea mearkkašupmi geavaheaddjidohkkeheapmái.
Leat go gieldda áššemeannudeaddji? Dás sáhtát logget sisa CERT:i
Guoská dušše Romssa suohkaniidda.
Njuolggadusat ja ohcanskovvi
Njuolggadusat Romsa (PDF, 114 kB)
Njuolggadusat Finnmárku (PDF, 253 kB)
Ohcanskovvi Romsa (PDF, 458 kB)
Ohcanskovvi Finnmárku (PDF, 115 kB)
Dávjá jerrojuvvon gažaldagat TT-koartta birra
TT-koarta lea máksinkoarta magnehtabáttiin. Koarta lea persovnnalaš ja dan sáhttá dušše eaiggát geavahit. TT-koarta gusto dan áigodaga masa don leat ožžon geavaheaddjidohkkehusa. Seamma koarta galgá geavahuvvot olles áigodaga.
Juohke jahkemolsumis gurrejuvvo koarta ja devdojuvvo fas ođđa juolluduvvon supmiin. Jus it leat geavahan dahje uhccán geavahan TT-koartta, de ii juolluduvvo uhcit supmi maŋit jagi.
Go ođasmahttojuvvon geavaheaddjidohkkehus juolluduvvo, de galggat ain geavahit boares koartta. Ođđa submi devdojuvvo iešalddis kortii.
Fuomáš ahte koarta giddejuvvo go supmi lea geavahuvvon. Dat rahppojuvvo fas maŋit juolludeamis. Koarta ii doaimma go sáhttovuoigatvuohta lea nohkan. Dutnje dieđihuvvo sáhttovuoigatvuođa nohkama birra ovddalgihtii vai lea vejolaš ohcat ođđasit. Dalle geavahat seamma ohcanskovi go ođđa ohccit.
Romssas máksá geavaheaddji 10 % iežasoassin, dahje uhcimusat 20 ruvnnu, mátkki olleshattis, ja reasta váldojuvvo dan supmis mii vel lea TT-koarttas. Finnmárkkus máksá geavaheaddji iežasoassin seamma ollu go dan maid gudnebileahtta máksá.
TT-koartta sáhttá geavahit astoáigemátkkiide droššain.
Dat ii galgga geavahuvvot bargui, oahpu váldimii, doaktárii/fysioterapevtii dahje eará bálvalusaide maid álbmotoadju máksá.
TT-koarta ii gusto skuvla- dahje bargomátkkiide ge.
Man ollu dutnje devdet TT-kortii, sorjá das guđe geavaheaddjijovkui ja avádahkii don gulat. Juolludussubmi sáhttá rievdat dannego juolludeami vuođđun leat fylkagieldda jahkásaš juolludeamit.
TT-koartaortnegii gullet guokte geavaheaddjijoavkku:
Geavaheaddjijoavku A, geat dárbbašit erenoamášbiilla, geain lea heajos oaidnu dahje geat leat áibbas čalmmeheamit.
Geavaheaddjijoavku B, geat eai dárbbaš erenoamášbiilla.
Buot geavaheddjiide mearriduvvo geavaheaddjiavádat dan vuođul man guhkki lea ássančujuhusas gieldda guovddážii/čoahkkebáikái.
Seamma gieldda seamma avádaga geavaheaddjit ožžot seamma supmi.
Avádagat Romssas
- 1-5 km.
- 5-10 km.
- 10-15 km.
- 15-20 km.
- Buot badjel 20 km.
Avádagat Finnmárkkus
- 1-5 km.
- 5-10 km.
- 10-30 km.
- Buot badjel 30 km.
Dan áigodagas go don leat dohkkehuvvon TT-geavaheaddjin, devdojuvvo du koarta ođđa supmiin juohke jagi dahje jahkebeali, sorjavaččat du álgoálgosaš dohkkehusas, ođđajagimánu 1. b dahje suoidnemánu 1. b.
Ođđa geavaheddjiide boahtá iešalddis TT-koarta juolluduvvon supmiin. Submi sorjá das guđe geavaheaddjijovkui ja avádahkii don gulat. Ii addojuvvo eanet ruhta do dan mii lea mearriduvvon.
Dieđuid koartta sáldo birra lea vejolaš oažžut máŋgga láhkai:
- Riŋget Rogaland Taxi, tel 51 90 90 01
- Interneahttačujuhusa www.rtt.no/tt bokte. Deavdde geavaheaddjinummira rabas ruktui.
- Sádde teakstadieđu (SMS) geavaheaddjinummiriin dán telefonnummirii: 40 46 60 00. Dáppe oaččut vástádusa birrajándora.
Gielddat dat dohkkehit geavaheddjiid. Danne sáhttá dan jearrat geavaheaddji ássangielddas.
Geavaheaddjit sáhttet ohcat buot jagi 12 mánus. Ohcan meannuduvvo 4 vahku siste. Koarta lágiduvvo dakkaviđe go ohcan lea meannuduvvon ja dohkkehuvvon.
Geavaheaddjis lea alddis ovddasvástádus dieđihit gildii go dáhpáhuvvet rievdamat main lea mearkkašupmi geavaheaddjidohkkehusa ektui.
Gielddat dohkkehit sáhttobálvalusa geavaheddjiid. Mearrádusa váidaga galgá olmmoš sáddet dan gildii mii lea meannudan ohcama.