– Lea stuorra dáhpáhus dáppe Davvenjárggas, dajai fylkkasátnejođiheaddji Hans-Jacob Bønå go Equinor-searvevuohta formálalaččat adde eret buot simulatuvrraid Davvenjárgga joatkkaskuvlii. 

Son dajai go deaivvadedje Honnesvágis ahte dát lea ođđa olahus joatkkaskuvlii, mii lea sihke skuvllas, fágaskuvllas ja sihkarvuođaguovddážis stuorra ávkin ovddos guvlui sihke oahppiide, studeanttaide, bargiide Equinor-searvevuođas ja maritiima ealáhussii muđui.  

Historjjálaš mearkkašupmi

Jagi 1947:s Oslo gielda juolludii 1,6 miljovnna ja Stáhta ges 1 miljovnna Stáhta Guolástanskuvlii (Statens Fiskerfagskole). Skuvlla ceggejuvvui ja vuosttaš oahppit álge skuvlajagi 1954-1955. 

– Váccidettiin skuvlla guhkes feaskkáriid de oidnojit govat ovddeš ohppiin. Máŋggas sis barge fanasveagas Finnmárkku feastonuohttefatnasiin ja riddofatnasis. Skuvla lea leamaš mielde huksemiin servodaga Finnmárkkus ja das lei erenoamáš dehálaš rolla Finnmárkku ođđahuksemis maŋŋel soađi, dajai Bønå. 

Ođđa áigodat

Davvenjárgga joatkkaskuvla lávke ođđa maritiima áigodahkii, ja ođđa áigodahkii oljobohkama ja gássabuvttadeami dáfus, go buktet máhttu ja gelbbolašvuođa bargiide oljobohkamis ja gássabuvttadeamis rittu guora ja Barentsábis. Sii leat maid ovdavázzit dáppe davvin go buktet iešguđet gelbbolašvuođa fuolahan dihte sihkkarvuođa daid seamma surggiin. 

– Fylkkajođiheaddjin lean hirpmástuvvan historjjás, ja lea stuorra politihkalaš dáhttu ovdánahttit skuvlla ja servvodaga. Dán mii čájehat Davvenjárgga joatkkaskuvlla eaiggátvuohtamet bokte ja maiddái Finnmárkku fágaskuvlla mas lea ossodat dáppe Davvenjárggas.          

Searvevuohta

– Mii leat duhtavaččat šiehtadusain mii mis lea Equinor-searvevuođain. Sii leat dahkan dehálaš mearrádusaid ja garrasit áŋgiruššan Honnesvági báikegottiin. 

Finnmárkku fylkkagielda ja skuvla besse maŋŋebárgga váldit badjelasaset simulaturpárkka. Dát leat simulatuvrrat maid searvevuohta máksá. Simulatuvrrat geavahuvvojit ollu maritiibma hárjehallamii ja kursemii ja leat várra dat ođđaseamos ja buoremusat ovddiduvvon reaiddut mat gávdnojit Norggas. Fylkkalávdegoddi searvvai maiddái dáhpáhussii, ja čoahkkanedje skuvlii.

Dál lágiduvvojit badjel 50 iešguđetlágan kurssa, gearggusvuođahárjehallama ja ovttasbargohárjehallama mearraolbmuide, mariidna/maritiima ealáhusaide, ja offshore-ealáhusaide.

- Finnmárkku fylkkagieldda bealis háliidan giitit Equinor-searvevuođa go leat addán simulatuvrrapárkka fylkkagildii ja Davvenjárgga joatkkaskuvlii.  Háliidan maiddái giitit Davvenjárgga joatkkaskuvlla jođihangotti, fágaolbmuid ja áŋggirdeaddjiid geat ovttas searvevuođain leat dahkan dán duohtan, dajai fylkkasátnejođiheaddji sártnistis.