Gurtbealde: Oahpaheaddji Eva Ulriksen ja oahppiguoktá Runa Ingeborg Karlsen ja Shafera Andersen Grüne Woche doaluin Berlinas. Chand Deep Kardey

Áidnalunddot oahppoarena 

Shafera Andersen (17) ja Runa Ingeborg Karlsen (17) vázziba restoráŋŋa - ja biebmofága Jo2, ja oassálastiba meassuide oktan oahpaheaddjiin Eva Ulriksen. Doppe soai deaivaba gussiid miehtá máilmmis geat háliidit muosáhit ja oahpásmuvvat Norgga ja Davvi-Norgga borramušaiguin. 

– Lea hui miellagiddevaš beassat searvat dákkár stuorra doaluide. Moai ohppe ollu guossoheami birra ja mo háleštit olbmuiguin - juoga maid olmmoš ii beasa vásihit skuvlagievkkanis, dadjá Runa Ingeborg Karlsen. 

Bargohárjáneapmi luohkkálánja olggobealde

Meassut leat hárvenaš vejolašvuohtan ohppiide geavahit dan maid skuvllas leat oahppan.

– Moai besse geahččaladdat albma bargodilálašvuođas doaibmat, nugo ráhkadastit ja guossohit unnahámát borramuša. Das oahppá ollu, muhto lea maid somá, dadjá Karlsen. 

Oahpaheaddji Eva Ulriksen deattuha mearkkašumi das go oahppit besset dákkáriid vásihit.

– Sii ožžot deaivvadit báikkálaš biebmobuvttadeaddjiiguin ja oahpásmuvvat iešguđetge surggiid bargguiguin. Nu sii ožžot oaidnit mo dat lea ovdalgo ieža šaddet fidnooahppin, son dadjá. 

Besset ovdanbuktit davvinorgalaš kultuvrra ja borramuša 

Oahppit vásihit ahte olbmuiguin lea stuorra beroštupmi davvi kultuvrii ja borramuššii.

– Guossit leat hui sáhkkit kultuvrra ja borramuša hárrái mii mis lea dáppe davvin. Mii fuolahat ahte besset muosáhit mo mii eallit davvin,  dadjá Shafera Andersen.