Kjersti Vevstad lea nammaduvvon ođđa fylkkagielddadirektevran ođđajagimánu 1. b 2026 rájes. Studio Wangberg

Finnmárkku fylkkagieldda virgelávdegoddi lea ovttajienalaččat nammadan Kjersti Vevstad ođđa fylkkagielddadirektevran ođđajagimánu 1. b 2026 rájes. Vevstadas lea nanu jođihanvásáhus gielddasuorggis, ja boahtá virggistis dearvvašvuođa ja birgejumi direktevran Davvi Follo gielddas. 

Fylkkasátnejođiheaddji lea duhtavaš

Duhtavaš: Fylkkasátnejođiheaddji Hans-Jacob Bønå (H) lea hui duhtavaš go beassá nammadit Vevstad. Karoline Almås Sørensen/FFK

– Mii leat hui duhtavaččat go beassat nammadit jođiheaddji geas lea viiddis vásáhus, strategalaš áddejupmi ja alla čađahannákca, dadjá fylkkasátnejođiheaddji Hans-Jacob Bønå (H). 

– Vevstad ovttastahttá čielga ja liekkus hálddašeami ovttasbargguin, ja lea čájehan ahte nákce oččodit ovdáneami máŋggadáfot organisašuvnnain, son lasiha. 

Kjersti Vevstadas lea leamaš njunušjođiheaddjin sihke dearvvašvuođa-, bajásšaddan- ja servodatovdánahttinsuorggis. Sus lea jođiheami master ja pedagogihkka master, ja vuođđooahppu adjunktan Oslo Universitehtas.  Vevstad lea čađahan stuorra nuppástusproseassaid buriid bohtosiin. 

Beroštupmi Finnmárkku rollii 

Beroštupmi servodahkii ja Finnmárkku rollii Norggas movttiidahtii su ohcat fylkkagielddadirektevrra virgái. 

– Finnmárkkus lea erenoamáš sadji min riikkas. Lea guovlu mas leat stuorra vejolašvuođat, čielga identitehta ja nationála mearkkašupmi. LEa movttiidahtti beassat oppalaš ovdáneapmái váikkuhit, buriid bálvalusaid ássiide oččodit - ja nanu ovttasdoaimma gaskal politihka, fágaid ja báikegottiid, dadjá Vevstad. 

Geopolitihkalaš mearkkašupmi

Erenoamáš ovddasvástádus mii čuovvu jođiheaddjivirggi Finnmárkku fylkkagielddas lea guovllu geopolitihkalaš mearkkašupmi. 

– Finnmárku lea Norgga nuortarádji, strategalaš báiki otná dilálašvuođas mii lea báidnojuvvon eahpesihkarvuođas ja máilmmiviidosaš rievdadusain. Mu movttiidahttá diekkár ovddasvástádus – beassat váikkuhit bisuhit Finnmárku oadjebas, nanus, eleš ja iešdiđolaš guovlun gos ii leat beare sáhka guvllolaš ovdáneamis, muhto maid das ahte sihkkarastit Norgga beroštumiid stuorát geahčastaga ektui, dadjá Vevstad.

Son čujuha maiddái dasa ahte man dehálaš ovttasbargu lea ealljun gieldda ovdáneapmái: 

– Mus lea doaivu dakkár jođiheapmái mii lea oidnosis, guldala ja lea čielga. Fylkkagielddadirektevran háliidan láhčit dili viiddis searvamii, guhkesáigeplánemii, ja lágas ovttasdoibmii politihka, hálddašeami ja báikegottiid gaskal. Mu vásáhus lea ahte buot buoremus čovdosat ihtet go mii loktet fárrolaga - fágaid, dásiid ja beroštumiid doarrás. 

Erenoamáš fylkkadikkečoahkkin

Virgáibidjanášši meannuduvvo fylkkadikki erenoamáščoahkkimis borgemánu 28. beaivve Hámmerfeasttas. 

Sámegillii ođasmahttojuvvon 18.08.2025 | Samisk versjon oppdatert 18.08.2026