Dálkkádat- ja birasministtar Andreas Bjelland Eriksen ovttas fylkkasátnejođiheddjiin Hans-Jacob Bønå (O). Kristin Foosnæs

Ođđasa almmuhii dálkkádat- ja birasministtar Andreas Bjelland Eriksen borgemánu 19. beaivvi Ceavccageađggis. Maiddái Sámediggepresideanta, Báhcavuona, Unjárgga ja Deanu gielddaid sátnejođiheaddjit ja fylkkasátnejođiheaddji Hans-Jacob Bønå serve.

– Odne ávvudit mii historjjálaš dáhpáhusa Finnmárkku, Norgga ja máilmmiárbbi ovddas. Kulturmuittut mat dál čállojuvvojit gaskaboddosaš listui - ássamat, bivdorusttegat ja hávdesajit - leat duođaštussan min oktasaš vássánáiggis, man sáhttá guorrat 12 000 jagi maŋos guvlui, dajai fylkkasátnejođiheaddji Hans-Jacob Bønå almmuheamis.

Vihtta sajusteami

Várjjat Siiddas leat vihtta sajusteami Unjárgga, Deanu ja Báhcavuona gielddain. Guhkes bissovaš historjá, ja eanadaga ja kulturbirrasiid ovttasdoaibman, dahká dáid áidnalunddogin riikkaidgaskasaš oktavuođas.

Sámediggi lea ráhkadan fágalaš máhttovuođu gaskaboddosaš listui čáliheapmái, ja Finnmárkku fylkkagielda lea searvan.

– Mis lea ain ollu bargu ovddosguvlui. Finnmárku lea máilmmiárbefylka nr. 1 riikkas, ja doppe mii áigut nannet máhtolašvuođa, gaskkusteami, fátmmastit báikegottiid ja oččodit rámisvuođa min oktasaš historjái. Lean rámis go lean Norgga máilmmiárbefylkka fylkkasátnejođiheaddji, loahpahii Bønå sártnistis Ceavccageađggis.

Ceavccageađgi Kristin Foosnæs/FFK