Ulbmil bálkkašumiin lea gudnejahttit ja rámiidit soapmása gii lea earenoamážit áŋgiruššan Finnmárkku kultureallimis dahje dan ovddas.

Kathrine Nedrejord vuosttaš romána lei Transitt mii almmuhuvvui 2010:s, ja dan rájes lea son almmuhan máŋga rámiduvvon girjji, earret eará Forvandlinga (2018), Lappjævel! (2020) ja Sameproblemet (2024). Dramatihkarin son lea bargan viessodramatihkarin Nationálateáhteris.

Fylkkakulturbálkkašumi vuoiti 2025: Kathrine Nedrejord Fartein Rudjord

Árvvoštallamis lea erenoamážit deattuhuvvon makkár mearkkašupmi vuostáiváldis lea kultureallimii regionála, nationála ja internationála perspektiivvas. Nedrejord lea ožžon máŋga bálkkašumi, earret eará Havmannbálkkašumi (2019), Bragebálkkašumi (2024) ja Sultbálkkašumi (2025), ja son adnojuvvo okta dain deháleamos jienain Davvi-Norgga girjjálašvuođas min áigodaga.

Lokte muitalusaid Finnmárkkus

Nedrejord váikkuhus almmolaš sagastallamii sámi dilálašvuođaid birra Norggas, ja dan ahte čielga jienain lokte muitalusaid Finnmárkkus, dagaha ahte son ánssáša bálkkašumi. Vuhtto su čállimis ahte lea bajásšaddan Kárášjogas ja Gilivuonas, ja Finnmárkkus lea dehálaš rolla sihke fáttáin ja birasgovvádusain čállosiin. Nedrejord dávjá čállá duolbmama, identitehta ja gullevašvuođa birra, ja duogážis Finnmárkkus buktá erenoamáš fámu ja luohtehahttivuođa dáid perspektiivvaide, čuožžu árvvoštallamis. Teáhterbarggustis maid vuhtto davvinorgalaš duohtavuohta ja giella. 

Fylkkadiggi geigii bálkkašumi

Fylkkasátnejođiheaddji Bønå geigii bálkkašumi juovlamánu 9. b. fylkkadikkis. Nedrejord giiti váimmolaččat videocealkámuša bokte, gos son maid dovddahii man ollu Finnmárku mearkkaša sutnje. Son muitalii ahte dat áibbas sihkkarit vuhtto maid boahttevaš čállosiin.