Fylkkagieldadirektevra Heidi Brandt gurut bealde, fylkkasátnejođiheaddji Hans-Jacob Bønå ja várrefylkkasátnejođiheaddji Heidi Holmgren fylkkadikki čoahkkaneami rahpama oktavuođas Čáhcesullos.
Trond Magne Henriksen
Fylkkadiggi álggahuvvui nugo dábálaččat kulturovdanbuktimiin, dán háve lei Wilhelmsen Porsáŋggus eret. Ovdal go áššiid meannudeapmi álggii, bukte vuorrasiidráđđi, nuoraidráđđi, givssidanáittardeaddji ja KomRev Nord (gieldarevišuvdna) dieđuideaset ovdan.
Givssidanáittardeaddji raporta
Vuosttaš áššin maŋŋebárgga golggotmánu 14. b. válddii fylkkadiggi givssidanáittardeaddji 2024/2025 jahkeraportta (PDF, 6 MB) diehtun. Givssidanáittardeaddji bargá dan ovdii ahte mánáin ja nuorain galgá leat oadjebas ja buorre psykososiála biras mánáidgárddis, vuođđoskuvllas ja joatkkaoahpahusas. Áittardeaddji buktá jahkásaččat raportta barggus birra. Givssidanáittardeaddji rolla ii leat lága mielde geatnegas, lea olggobealde dábálaš hálddahuslaš stivrenvugiid ja lea organiserejuvvon njuolga fylkkadikki vuollai.
Bearráigeahččanlávdegotti hálddašanrevišuvnna "Busstransport" raporta
Bearráigeahččanlávdegoddi evttoha áššis ahte fylkkadiggi váldá diehtun hálddašanrevišuvnna “Ressursageavaheapmi ja ekonomiijastivren bussefievrrideami oktavuođas - mas earenoamážit deattuhuvvo skuvlasáhttu ja šiehtadusčuovvoleapmi”. Nu dagai ge fylkkadiggi.
Davvi-Norgga Eurohpákantuvrra ođđa ruhtadančoavddus
Finnmárkku fylkkagielda lea Brussela kantuvrra mieleaiggát. Doarjja lea lassánan 5,0 miljovnna ruvdnui ja ođđa juogadančoavddus mielddisbuktá ahte fylkkaid gaskkas juohkása ná: Nordlánda: 2 250 000, Romsa: 1 750 000 ja Finnmárku: 1 000 000. Eaiggátjuohku fylkkaid gaskkas ii leat rievdan vaikke lea ođđa juogadančoavddus. Geahča mearrádusa.
Mannama dieđiheapmi - Britt Øvregård (Ap)
Go Øvregård fárre Finnmárkkus, de válljejuvvui su sadjásaš fylkkadikki várreráiddus.
Doarjja TV-akšuvdnii 2025
Dán jagáš TV-akšuvnnas golggotmánu 19. b. galgá Atlas-alliansen (Atlas-ovttastus) veahkehit olbmuid geain lea doaibmahehttehusat, riikkain gos leat soađit, roasut ja geafivuohta. Sullii 1, 3 miljárdda olbmos máilmmis lea doaibmahehttejupmi, mii mearkkaša ahte sii leat máilmmi stuorámus minoritehta. Finnmárkku fylkkagielddas lea vierrun doarjut dakkár akšuvnnaid, ja fylkkadiggi juolludii 1 ruvnno juohke ássi nammii, sullii 75 000 ruvnno.
Ovttasbargošiehtadus giliovdánahttinšiehtadusaiguin
Fylkkadiggi mearridii ovttasbargošiehtadusa gaskal Finnmárkku fylkkagieldda ja Finnmárkku giliovdánahttinšiehtadusaid: Oarje-Várjjat, “Váibmoguovlu” ja Gaska-Finnmárku 2025 - 2027. Das lea sáhka ee. servodatovdánahttima ja plánema birra, viessohuksema birra ja ođđa viessofálaldagaid birra, dávgasis ja gáiddus oahpahusa birra ja ealáhusovddideami birra.
Fitnodatšiehtadusa rievdadeapmi - NOVARI
Fylkkadiggi mearridii muhtun rievdadusaid šiehtadusas gielddaidgaskasaš fitnodagain Novari. Finnmárkku fylkkagielda eaiggáduššá Novari IKS ovttas eará fylkkagielddaiguin ja Oslo gielddain. Novari IKS fitnodatšiehtadus mudde gaskavuođaid fitnodagas. Gustojeaddji fitnodatsoahpamuš lea mielddusin. Novari lea gielddaidgaskasaš fitnodat mii fuolaha fylkkagielddaid oktasaš IT-vuogádagaid hálddašeami ja ovddideami joatkkaoahpahusa, johtalusa ja teknologiija oktavuođas.
Ođđa kulturmuitoláhka
Ođđa kulturmuitoláhka lea láhkaevttohusa čielggadeapmi mas leat mearrádusat kulturbirrasa gáhttema birra, ja galgá boahtit gustovaš kulturmuitolága sadjái. Fylkkadiggi mearridii gulaskuddancealkámuša. Das lea sáhka ee. ráfáidahttima jahkelogut, girkut, máilmmiárbi ja vejolaš lassebuhtadus eaiggádii/ huksejeaddjái.
Evttohasat stivrraide, ráđiide ja lávdegottiide
Fylkkadiggi mearridii evttohasaid Dearvvašvuohta Davvin 2026-2028 dearvvašvuođaásahusaid stivrraide, regionála dearvvašvuođaásahusaid stivrraide, Finnmárkkuopmodaga dárkkistanlávdegoddái, johtalusa váldolávdegotti várrelahttui, Davvi-Norgga Eurohpákantuvrra áirrasgoddái ja Novari IKS válgalávdegoddái.
Ođđa gilvvagordnefoandda ásaheapmi
Fylkkadiggi mieđihii ásahit gilvvagordnefoandda mas lea lagabui 200 miljovnna kruvnnu. Fylkkagielda áigu leat mielde dás, ja bargat dan ovdii ahte oažžut stáda searvat. Duogáš lea ahte Finnmárkkus lea erenoamáš dilli go muđui riikkas kapitála vátnivuođa dáfus, danne go fylkkas maŋemus jahkečuođis leat leamaš guokte stuorra áigodaga mearkkašahtti kapitálanjiedjamiin. Boaldin nuppi máilmmisoađis, heahtedilli Finnmárkku guolástusas 1990-logus ja ođđa njiedjamat guolleearis namuhuvvojit.
Viessohálddašeami stáhtus
Fylkkadiggi váldá Finnmárkku fylkkagieldda viessohálddašeami stáhtusraportta diehtun. Bivdet fylkkagieldadirektevrra máhccat fylkkadiggái maŋimusat njukčamánus 2026 ollislaš čuovvulemiin fylkkalávdegotti mearrádusas áššis 55/25.
Galle duhát máná galget oažžut RS-virusa ovdalgo ráđđehus dahká juoidá?
Fylkkadiggi dohkkehii máŋga cealkámuša juo vuosttaš beaivvi. Vuosttaš lea mánáid ja RS-virusa birra.
Finnmárkku fylkkagielda moaitá garrasit láhkarihkkumiid mat leat fuomášuvvon Finnmárkku buohcceviesus
Fylkkadiggi mearridii cealkámuša Finnmárkku buohcciviesu birra.
Ovttas bargat eallinagi nissondearvvašvuođa ovdii
Dán cealkámušas gáibida Finnmárkku fylkkadiggi ahte nissondearvvašvuohta galgá loktejuvvot mearkkašahtti muddui dutkamis, dikšumis ja das mo dearvvašvuođabálvalus lea organiserejuvvon.
Suodjalus ferte veahkkin siviila huksemii Finnmárkkus
Fylkkadiggi háliida ahte ráđđehus ja stuorradiggi sihkkarastet ahte Suodjalusa oassálastin davvin lea mielde huksemin siviila suorggi geavadis, čuožžu dán cealkámušas.
Davvi Dearvvašvuohta - luohttámušrihkkun davvin
"Luohttámušrihkkun Davvi Dearvvašvuođas čájeha ahte lea áigi guorahallat fitnodatmálle mii čielgasit lea mielde stuorideamen erohusa gaskka mearrádusdahkkiid ja pasieanttaid ja báikegottiid duohtavuođa davvin" lea oassi dán cealkámuša sisdoalus.
PS: Ášši ođasmahttojuvvo dađistaga. Loahpalaš mearrádusat oktan vejolaš lassi- dahje rievdadusevttohusaiguin biddjojuvvojit liŋkkaide (sáhttá ádjánit veaháš). Fylkkadiggi joatká gaskavahku golggotmánu 15. b dii. 0900.
Sámegillii ođasmahttojuvvon 14.10.2025 dii. 16:51 | Samisk versjon oppdatert 14.10.2025 kl. 16:51