Finnmárkku fylkkagieldda almmolaš ovddasteaddji Grüne Woche doaluin Mikkel Isak Eira, deaivvai eanadoalloministtara Nils Kristen Sandtrøen Berlinas.
Chand Deep Kardey
Stuora beroštupmi Davvi-Norgga fálaldagaide Berlinas
Ollusat leat jeavddalaččat fitnan Davvi-Norgga fálaldagaid iskamin Grüne Woche nammasaš doaluin Berlinas .Olbmot háliidit máistit Davvi-Norgga biebmogálvvuid, guldalit muitalusaid borramušaid, kultuvrra ja vásáhusaid birra Finnmárkkus ja muđui Davvi-Norggas.
– Dát lea hui buorre deaivvadanbáiki gos čeahpes fitnodagat ja biebmobuvttadeaddjit besset čájehit iežaset buktagiid, dadjá eanandoalloministtar Nils Kristen Sandtrøen.
– Soaitá juste buorre borramušvásáhus mii geasuha olbmuid Finnmárkui, son lasiha.
Bidjet návccaid borramušturismii
Oassálastin Grüne Woche doaluin lea oassi fylkkagieldda guhkitáiggi barggus nannet regiovnna borramušturismma. Finnmárkkus leat áidnalunddot ávdnasat, nana árbevierut ja luonddu- ja kulturvásáhusat mat addet buriid vejolašvuođaid árvoháhkamii.
Joatkkaskuvlaoahppit leat veahkkin
Joatkkaskuvlaoahppit maid oassálastet ja leat veahkkin Davvi-Norgga fálaldagaid láhčit meassuin. Oahppit ožžot dainna lágiin vásáhusaid mat leat ávkin viidáseappot sin oahpus.
– Lea somá oaidnit čeahpes ja áŋgiris ambassadevrraid geat fuolahit ahte Davvi-Norgga gálvoávdnasat geavahuvvojit dađistaga eanet, dadjá Sandtrøen.