Dát galget ovddastit Finnmárkku Berlinas

Lea alla dássi Finnmárkku ovddasteddjiin go áigot ovdanbuktit Davvi-Norgga internationála borramuš- ja mátkeealáhusmeassuin Grüne Woche Berlinas ođđajagimánu 16.-25. b 2026.

ČOAHKKIS: Finnmárkku, Nordlándda ja Romssa oassálastit čoahkkanan Romsii. Ingvill Bang, Nordlándda Stáhtahálddašeaddji

– Dát šaddá miellagiddevaš. Mii eat leat searvan ovdal, muhto lean dán čoahkkaneami botta ádden ahte leat hui stuorra dáhpáhus. Mii leat rámis min bargguin, ja mearkkaša ollu beassat ovdanbuktit dan, dadjá Ove Mannsverk Mannsverk gård:as Álttás.

Finnmárkku ovddasteaddjit ledje gieskat čoahkkanan ovttas oassálastiiguin Nordlánddas, Romssas ja Svalbárddas, guokte beaivái Romsii.

Čielga identitehta

Doppe deaivvadedje 30 fitnodaga, oahppi ja oahpaheaddji 4 joatkkaskuvllain nannen dihte ovttasbarggu ja ráhkkanan dihte internationála borramuš- ja mátkeealáhusmeassuide Grüne Woche (GW) Berlinas ođđajagimánu 16.-25. b 2026.

Vuolimuččas artihkkalis gávnnat oppalaš listtu mii čájeha buot oassálastiid.

Finnmárkku oassálastit leat mielde loktemiin Davvi-Norgga dehálaš borramušregiovdnan čielga identitehtain.

Gelddolaš ohppiide

FIDNOOAHPPIT: Golbma davimus fylkkaid joatkkaskuvlaoahppit galget guossuhit borramuša Berlinas. Ingvill Bang, Nordlándda Stáhtahálddašeaddji

Dehálaš buktu Finnmárkkus boahtá restoráŋŋa - ja biebmofágas Davvinjárgga joatkkaskuvllas, geat áigot guossohit davvinorgalaš borramuša Berlinas.

– Šaddá gelddolaš ovttasbargat ođđa olbmuiguin. Veahá balan ahte šaddá diliheapme, muhto mii áigut oahppat ja oažžut jáhketmeahttun vásáhusaid, dadjá Shafera Andersen skuvllas.

Jagi 2026:as meassut lágiduvvojit 100. geardde, čohkkejit badjel 1500 čájeheaddjiid, ja geasuhit birrasii 400.000 gussiid.

GW 2026:as loahpahuvvo Eanadoallo- ja biebmodepartemeantta golmmajahkásaš áŋgiruššan, gos Davvi-Norga lea ovttasbargan regiovnna borramuškultuvrra ja máhtu oainnusmahttit internationála lávddis.

Čielga guvllolaš ealljun

Aase Lømo, fágadirektevra Eanadoallo- ja biebmodepartemeanttas, deattuha čoahkkaneamis Romssas ahte Grüne Woche lea leamaš dehálaš Norgii beagginprošeaktan 1987 rájes, ja ahte meassu doaibmá čájáhuslávdin ja politihkalaš bargobádjin.

ÁLGOÁVDNASAT: Čoahkkaneamis Romssas besse buvttadeaddjit buktit ovdan gálvvuideaset. Ingvill Bang, Nordlándda Stáhtahálddašeaddji

GW lea maid strategalaš lávdi gos beassá nannet Norgga beaggima borramuš- ja mátkeealáhusnašuvdnan gos Davvi-Norga lea čielga guvllolaš ealljun.

Nordnorsk kompetansesenter Mat (Davvi-Norgga gelbbolašvuođaguovddáš Borramuš) jođiha Davvi-Norgga oassálastima oktan stivrenjoavkkuin Finnmárkku, Nordlándda ja Romssa fylkkagielddas/fylkkasuohkaniin, Stáhtahálddašeddjiiguin davvin, Innovasjon Norge-kantuvrraiguin davvin, Sámedikkiin ja Nordnorsk Reiseliv.

Nana ovttasbargu davvin

Fylkkagielddat/fylkkasuohkanat, Sámediggi ja Innovasjon Norge dorjot áŋgiruššama.

Meassuide searvat ii leat dušše oainnusmahttin, muhto maid buktá konkrehta lassiváikkuhusaid, nugo ođđa ovttasbargguid, eksportavejolašvuođaid ja vel nannoset oktavuođa borramuša, mátkeealáhusa ja oahpu gaskka davvin.

Vásáhusat GW 2025:as čájehit ahte nana ovttasbargu aktevrraid gaskka miehtá Davvi-Norgga - sihke buvttadeaddjiid, goahkka-joavkkuid ja fylkkagielddaid ja gaskaoapmeapparáhtaid - váikkuha oahppamii, gudnedovdui ja bistevaš fierpmádagaide regiovnnaid rastá.