Fv: Heidi Holmgren - fylkkavárresátnejođiheaddji, John Olav Fuglem - Finnmárkku brigáda álgi hoavda, Jørn Qviller – Finnmárkku eanansuodjalusa heaiti hoavda, Heidi Brandt – gaskaáigásaččat virgáibiddjon fylkkagielddadirektevra
Chand Deep Kardey
Finnmárkku brigáda ásaheapmi
Čoahkkima lágidii Suodjalus Finnmárkku brigáda ásaheami oktavuođas, mii oažžu ođđa hoavdda borgemánu 20. b. Suodjalusa bealis bođii Finnmárkku brigáda álgi hoavda, John Olav Fuglem, ja Finnmárkku Eanansuodjalusa heaiti hoavda, Jørn Qviller. Čoahkkaneapmi lei dehálaš lávki fylkkagieldda ja Suodjalusa gaskasaš ovttasbarggu viidásetfievrrideamis ja ovddideamis.
- Lea buorre ahte Suodjalusas lea beroštupmi buorebut oahpásnuvvat fylkkagielddain ja joatkit dán buori ovttasbarggu, dajai fylkkavárresátnejođiheaddji Heidi Holmgren.
Fylkkagieldda rolla ollislaš gearggusvuođas
Suodjalus oaččui buoret čilgehusa fylkkagieldda rolla ja ovddasvástádusa hárrái ollislaš gearggusvuođas ja ollislašsuodjalusas. Johtalusossodat buvttii ovdan mo fylkkagielda, mii lea sihke geaidnoeaiggát ja mas lea ovddasvástádus kollektiiva fievrrideamis ja siviila fievrridangearggusvuođas, lea mielde nanneme gearggusvuođa Finnmárkkus.
Báikkálaš lágideaddjiid ovddideapmi guovddážis
Ealáhusossodat muitaledje man láhkai áŋgiruššet lágideaddjiid ovddideamis, ja earenoamážit deattuhedje man dehálaš lea ahte Suodjalus geavaha báikkálaš gálvolágideaddjjiid háhkamiiddis.
Suodjalusguoskevaš oahppofálaldagat
Oahpahusossodat ovdanbukte plánaid ásahit suodjaluslinjá Leavnnja joatkkaskuvlii. Muitaledje maid ođđa ovddasmanniprošeavtta birra Jo2 ohppiid várás nanusvuođa birra, mii álggahuvvo dán čavčča.
Regionála plána nanusvuhtii
Suodjalus oaččui dieđu barggu álggaheami birra regionála plánain nanusvuhtii Finnmárkkus. Plána ulbmil lea loktet Finnmárkku álbmoga oadjebasvuođa ja nationála sihkarvuođa dakko bokte ahte buoridit gearggusvuođa ja nanusvuođa. Plána ulbmil lea nannet ja hukset servodatoassádalliid gaskavuođaid ja dahkat álbmoga eambbo dihtomielalažžan.
- Lea dehálaš čájehit dan dehálaš barggu maid mii dahkat dasa ahte nannet vuostálastinfámu ja nanusvuođa, dajai gaskaáigásaččat virgáibiddjon fylkkagielddadirektevra Heidi Brandt.
Viidáset ovttasbargu
Čoahkkin fievrridii viidáset dan buori ovttasbarggu mii lea ásahuvvon Finnmárkku Eanansuodjalusain maŋimuš jagiid, ja láhčá vuođu lagas oktavuhtii Finnmárkku brigádain boahtteáiggis. Juo boahtte vahkku ožžot maid Finnmárkku sátnejođiheaddjit cealkámuša Qvilleris ja Fuglemis fylkkasátnejođiheaddji konferánssas.
Sámegillii ođasmahttojuvvon 18.08.2025 | Samisk versjon oppdatert 18.08.2025