SAJIS: Fylkkasátnejođiheaddji ovddasta Finnmárkku Arenal-vahkus. Karoline Almås Sørensen / Finnmárkku fylkkagielda

-  Deike čoahkkanit oassádallit miehtá riikkas, ja lea arena gos servodatdigaštallan lea guovddážis. Finnmárkkus lea jietna - ja dat galgá gullot, dadjá fylkkasátnejođiheaddji Hans-Jacob Bønå. 

Fylkkasátnejođiheaddji,  váldolávdegotti jođiheaddji ja fylkkalávdegotti ovddasteaddjit servet dán vahku Norgga stuorámus politihkalaš bargobádjái, Arendalsuka (Arendal-vahkku). 

Erenoamáš deaivvadanbáiki

DAVVI-NORGGA OVDDAS: Hans-Jacob Bønå, Hallgeir Strifeldt, Magne Ek, Raymond Robertsen, Trine Noodt ja Arne Myrseth Davvi-Norgga-Beaivvis Arendal-vahkus. Karoline Almås Sørensen / Finnmárkku fylkkagielda

Deike čoahkkanit politihkkárat ja eará guovddáš aktevrrat geat áŋgiruššet servodateallimiin. Dat addá máŋga vejolašvuođaid deaivvadit - sihke formálalaččat ja eahpeformálalaččat.

- Arendal-vahkku lea earenoamáš deaivvadanbáiki, gos Finnmárku sáhttá ásahit ođđa oktavuođaid - sihke mearrádusdahkkiiguin ja ovttasbargoguimmiiguin - mii dasto sáhttá leat mielde ovddideamen fylkka.

Maŋŋebárgga oassálastet Finnmárkkupolitihkkárat Davvi-Norgga-beaivái maid Energi i Nord lágida. Das hálai fylkkasátnejođiheaddji dan birra mii dárbbašuvvo ovddidan dihtii Finnmárkku ja Davvi-Norgga, lassin dasa go son searvvai panelasagastallamii.

Finnmárkovearru šattai lunddolaš fáddán

Bønå čalmmustahtii sáhkavuorustis fylkkagieldda rolla servodatovddideaddjin ja daid erenoamáš vejolašvuođaid mat leat riikka davimus fylkkas.

- Dieđusge šattai fáddán Finnmárkovearru. Soapmásat soitet dadjat ahte sierra vearropáhkka Finnmárkku várás šaddá menddo divrrasin, muhto sihkkarvuođapolitihkka lea divrras. Lea ge juste dasa mii háliidit oččodit stuorát áddejumi dan botta go leat dáppe, lohká fylkkasátnejođiheaddji.

Finnmárkku jietna

Ovttajienalaš fylkkadiggi mearridii njukčamánu ahte háliidit vearropáhka Finnmárkui. Dát lea Finnmárkku politihkkáriid duogáš, earret eará, go vulget Arendalii. 

- Mii leat dáppe danne go mis lea bargamuš Finnmárkku bealis. Arendal-vahkku čohkke olbmuid geat sáhttet ja háliidit ovdánahttit servodaga, ja daiguin mii háliidit ságastallat, dadjá Bønå.