ČOAHKKIS: Maŋábealde gurutbeales: Lars Hustad, Tor-Erik Labahå, Rolf Laupstad, Hans-Jacob Bønå, Magnus Mæland, Jan Morten Hansen, Terje Rogde og Jo Inge Hesjevik. Ovddabealde gurutbeales: Ingrid Majala, Øyvind Hauken, Anna Oliva Taksgård, Berit Ranveig Nilssen, Trine Noodt, Ragnhild Vassvik og Kristin Johnsen. Chand Deep Kardey

Vuossárgga čoahkkanedje Finnmárkku sátnejođiheaddjit ja gielddadirektevrrat Čáhcesullo Fylkkavistái, gos fylkkasátnejođiheaddji Hans-Jacob Bønå bovdii dán jagáš sátnejođiheaddjikonferánsii - konferánsii maid son dál lohká árbevierrun.

– Munnje lea dát dehálaš arena deaivvadit buot sátnejođiheddjiiguin seamma lanjas, nu ahte mii sáhttit digaštallat dehálaš ja dárbbašlaš - ja váttis - fáttáid maid hárrái mii eat leat ovttaoaivilat, dajai Bønå rahpamis.

Gulahallan ja ovttasdoaibman

Čoahkkima ulbmil lea oččodit gulahallama ja ovttasdoaibmama gaskkal fylkkagieldda, gielddaid ja eará guoskevaš oassádalliid, ja gielddaid rájáid rastá.

Konferánssa vuosttaš beaivvi fáddá lei nanu ja ceavzilis Finnmárku ja areálaovddideapmi Finnmárkkus.

Finnmárkkubrigáda 

Prográmmas lei Jørn Qviller, Finnmárku eanansuodjalusa jođiheaddji, gii muitalii Finnmárkku suodjalusa birra, ja Finnmárkkubrigáda mii ásahuvvo borgemánu 20. beaivve. Su searvvis lei Finnmárkkubrigáda álgi hoavda, John Olav Fuglem. 

Terje Meyer Nuorta-Finnmárkku siviilasuodjalusas muitalii maid Siviilasuodjalus dárbbaša fylkkagielddas ja gielddain.

Holth&Winge ovddasteaddji Fredrik Holth doalai sáhkavuoru areálaovddideami birra Finnmárkkus, ja Gunhild Hoogensen Gjørv, UiT - Norgga Árktalaš Universitehta professor, hállagođii luohttámuša ja vuostehágu birra boasttudieđuid vuostá.

Nubbi beaivi: johtalus ja digitaliseren

Varanger Kraft ovddasteaddji Jens Betsi logaldalai elfápmosihkarvuođa birra, Anne Cathrine Larsen fylkkagielddas muitalii regionála nanusvuođa plána álggaheami birra, ja Gabriela Jurisic Ottesen Finnmárkku Rukses Ruossas (Røde Kors) čalmmustahtii organisašuvnna rolla ollislašsuodjalusas.

Sátnejođiheaddjikonferánsa joatká maŋŋebárgga, dalle lea fáddán johtalus, riikkaidgaskasaš bargu ja digitaliseren.

Johtalus ja infrastruktuvra

Okta váldodáhpáhusain nuppi ja maŋemuš beaivve sátnejođiheaddjikonferánssas ledje joavkodigaštallamat dan birra ahte makkár vuoruhemiid berreše buktit ovdan boahttevaš Nationála fievrridanplánas.

Vuoruheamit ledje máŋga: lasihit Davvi-Norgga rámmadoarjaga njealjis ovcci prosentii, buktit nationála stándarda geainnuide, fánasruvttuide ja geaidnodivodeamide. 

Sátnejođiheaddjit ja gielddadirektevrrat ledje goitge ovttaoaivilat ovtta áššis: girdiruvttot, girdilangeainnuid guhkodat ja girdišiljut lea dehálaš bargamuš fylkkagielddas ovddosguvlui. 

– Mii dárbbašat girdilangeainnuid mat duhtadit boahtteáigge gáibádusaid, celkkii Anna Oliva Taksgård. 

Nationála ja regionála proseassat

Maŋŋebárgga lei maiddái stáhtačálli Kristina Hansen konferánssas, gos son logaldalai vuoruhemiid ja viidáset proseassa birra mearrafievrrideami ja guolástanhápmaniid hárrái Finnmárkkus. 

Terje Hansen og stáhtačálli Kristina Hansen sátnejođiheaddjikonferánssas Čáhcessullos. Karoline Almås Sørensen

Davvenjárgga sátnejođiheaddji fuomášuhtii man láhkai sáhttit sihkkarastit buriid proseassaid stáda eisseválddiid ektui, ja Hermod Larsen, Várggáid várresátnejođiheaddji, buvttii čoahkkáigeasu joavkodigaštallamis. 

Internationála bargu ja raporttat

Davvi-Norgga Eurohpákantuvrra Nils-Kristian Nilsen ovdanbuvttii OECD-raportta ja maid dat muitala Finnmárkku birra. 

Digi 2030 

Prográmmas lei maid DIGI2030, gos prošeaktajođiheaddji Kari Lene Olsen ovdanbuvttii gávdnosiid gielddaid, ealáhusaid ja eaktodáhtolašvuođa kártemis, oktan gelbbolašvuođa váldolávdegotti jođiheaddjiin, Raymond Robertsen. 

Maid dál?

Digaštallamat, vásáhuslonohallan ja fágalaš sáhkavuorut guovtte beaivve badjel leat dál nohkan, ja fylkkasátnejođiheaddji Hans-Jacob Bønå dadjá ná konferánssa mearkkašumi hárrái:

– Ollu giitu buohkaide geat serve. Lean vissis ahte dát lea buorre deaivvadanbáiki midjiide geaiguin leat politihkalaš ovddasvástádus Finnmárkkus. Dáinna mii áigut joatkit, ja áigut sihke árvvoštallat ja smiehtat boahtte jagáš fáttá birra. Ja duhát giitu buohkaide geat leat veahkkin leamaš!

Dieinna lágiin loahpahuvvui sátnejođiheaddjikonferánsa 2025 - deaivvadanbáiki mii lea sihke nanusmahttán gielddaid ovttasbarggu, ja vuolggahan barggu dehálaš áššiid hárrái Finnmárkkus mat sávvamis fievrriduvvot viidáset. 

Sámegillii ođasmahttojuvvon 19.08.2025 | Samisk versjon oppdatert 19.08.2025