Finnmárkku fylkkagieldda álbmotdearvvašvuođa ráđđeaddi Eline Trasti Schanche. Julie Hoel/FFK

Ulbmil iskkeademiin lea háhkat eanet máhtu dearvvašvuođa, loaktima ja eallinárvvu birra Finnmárkku rávisolbmuid gaskkas. Finnmárkku fylkkagielda čađaha iskkadeami ovttasbargguin Álbmotdearvvašvuođainstituhtain (FHI) ja fylkka gielddaiguin. 

– Lea dehálaš guldalit olbmuid iežaset vásáhusaid go fylkkagielda ja gielddat áigot buoridit orrun- ja eallindili Finnmárkkus, dadjá Eline Trasti Schanche, fylkkagieldda álbmotdearvvašvuođaráđđeaddi. 

Oaččut bovdehusa SMS bokte jus leat válljejuvvon  

FHI sádde bovdehusa ja lasi dieđuid SMS bokte ássiide geat leat vuorbáduvvon oassálastit. 

Iskkadeamis mii jearahallat dearvvašvuođa, loaktima, lagasbirrasa ja eallinárvvu birra, ja eará dilálašvuođaid mat leat dehálaččat fylkka álbmotdearvvašvuhtii. Bohtosat galget geavahuvvot doarjut álbmotdearvvašvuođabargguid doppe gos don orut. 

Oadjebas oassálastit

Ádjána sullii 15-20 minuhta vástidit iskkadeami ja lea álki ja oadjebas oassálastit. Vástádusaid gieđahallan lea gustovaš personsuodjalannjuolggadusaid olis, nu ahte ii oktage sáhte dovdat olbmo almmuhuvvon vástádusaid bokte.

Dehálaš ahte don vástidat

Iskkadeami bohtosat buktet dehálaš vuođu sihke báikkálaš ja regionála álbmotdearvvašvuođabargui viidáset.

– Mii sávvat ahte ollusat vuoruhit vástidit. Vástádusat leat hui mávssolaččat fylkkagieldda ja gielddaid barggus vai šattaše buorre orrut fylkkasteamet, loahpaha Schanche.

Loga lasi FHI neahttasiidduin