Lea našuvnnalaš ulbmil uhcidit vahágiid mat gártet dan dihtii go gáhttenárvosaš kulturmuittut/kulturbirrasat massojuvvojit jahkásaččat. Kulturmuittut sáhttet jávkat dannego váilu diehtu ja máhttu kulturmuittuid birra ja gos dat leat. Okta doaibmabijuin lea oažžut buoret oppalašgeahčaldaga gáhttenárvosaš kulturbirrasiin mat gielddain leat. Buorit reaiddut leat gielddaid kulturbirasplánat. Plánat sáhttet addit einnostanvejolašvuođa sihke ássiide, huksejeddjiide ja gieldda politihkkariidda.
Landstasjonen i Oksvågen Lebesby kommune / Vuoksávági gáddestašuvdna Davvesiidda gielddas
Finnmark fylkeskommune / Finnmárkku fylkkagielddas
Mii lea KBBG?
Gielddain lea hui deaŧalaš sadji báikkálaš kulturmuitohálddašeamis. Finnmárkku fylkkagielda veahkeha fágalaččat bagadit daid gielddaid, mat háliidit ráhkadit doaibmabijuid dahje plánaid mat giddejit fuopmášumi kulturmuittuide.
Riikkaantikvára veahkeha dán barggu ovddidit áŋgiruššama bokte gielddaid kulturbirrasiid ovddas – KBBG. Áŋgiruššama ulbmil lea nannet gelbbolašvuođa, buoridit máhtolašvuođa ja oažžut buoret oppalašgeahčaldaga gáhttenárvosaš kulturmuittuin ja kulturbirrasiin báikkálaččat gielddas, ja dainna lágiin oažžut eanet diehto- ja máhttovuđot ulbmillaš ja beaktilis hálddašeami.
Buot gielddat sáhttet ohcat ekonomalaš doarjaga bargui kulturbirasplánaiguin, juogo álggahan dihtii barggu dahje ođasmahttin dihtii dáláš plánaid. Gielda ohcá doarjaga Riikkaantikváras, ja fylkkagielda gaskkusta skovi ja ohcanáigemeari gielddaide juohke jagi.
Politihkalaš mearrádus plána diŋgojumi hárrái galgá čuovvut ohcama.
Gielddat sáhttet gaskaneaset ovttasbargat kulturmuitoplánain ja ohcat ruđaid ovttasbargui. Lea maiddái vejolaš ohcat doarjaga kulturbirrasa ja vistegáhttema diehto- ja máhttoguovddážii, dahje gieldda gelbbolašvuođa doaibmabijuide.
Finnmárkkus leat 15 gieldda ožžon doarjjajuolludusa, dán rádjai leat čieža gieldda mearridan plána.
Mii lea kulturbirasplána (ovddeš kulturmuitoplána)?
Kulturmuitoplána lea gieldda oppalašgeahčaldat deaŧalaš kulturmuittuid ja kulturbirrasiid hárrái, ja sisdoallá plána dáid hálddašeami várás. Plána addá máhtolašvuođa vássánáiggi birra ja čielggada makkár kulturmuittuid mii áigut seailluhit boahtteáiggis." (Riikkaantikvára)
Kulturmuitoplána lea ávkkálaš reaidu gieldda kulturmuittuid hálddašeamis. Plána hábmen sorjá gieldda dárbbuin, ja dat ferte heivehuvvot dan geavaheapmái mii lea jurddašuvvon. Deaŧalaččamus lea ahte das leat čuovvovaččat:
- Oppalašgeahčaldat mas válddahuvvojit ja kárttain čájehuvvojit gieldda deaŧalaččamus kulturmuittut
- Evttohusat válljejuvvon kulturmuittuid hálddašeami ja bajásdoallama birra
- Plána mo kulturmuittuid vuhtiiváldin galgá leat mielde gieldda eará plánemiin ja doaimmain
- Dahkanoassi mas leat doaibmabijut plána ulbmiliid čađaheapmái
Leat golbma dábálaš vuogi movt kulturbirasplána sáhttá ráhkadit:
- Kulturmuittut fáddán gielddaplánas (gielddaplána areálaoassi)
- Fáddáplána
- Gielddaoasseplána kulturmuittuid/kulturbirrasiid várás
Don sáhtát lohkat lasi KBBG-áŋgiruššamis Riikkaantikvára neahttasiidduin
Sámegillii ođasmahttojuvvon: 23.04.2025
Samisk versjon oppdatert: 23.04.2025