Doarjjaortnet galgá oainnusmahttit, ovddidit ja nannet sámi giela ja kultuvrra Finnmárkkus. Ortnet galgá earenoamážit ovddidit čuovvovaš ulbmiliid:

• Nannet ja lasihit sámegiela geavaheami, earenoamážit mánáid ja nuoraid gaskkas
• Lasihit oassálastima ja geasuheami sámi kultuvrii, earenoamážit mánáid ja nuoraid
• Lasihit sámi giela ja kultuvrra gaskkusteami, earenoamážit mánáide ja nuoraide

Ruđat sáhttet juolluduvvot institušuvnnaide, organisašuvnnaide, servviide ja ovttastusaide, eaŋkiljoavkkuide ja ovttaskas olbmuide.

• Ruđaid sáhttá ohcat doaibmabijuide, mat ovddidit ja nannejit sámi giela ja kultuvrra Finmmárkkus.
• Doaibmabijut galget leat ráddjejuvvon áiggi dáfus.
• Váldonjuolggadus lea, ahte dorjojuvvojit duššefal doaibmabijut mat čađahuvvojit ja dáhpáhuvvet Finnmárkkus.
• Doaibmabijut main lea viiddis guvllolaš mearkkašupmi, vuoruhuvvojit.  
• Ohcamušat mat deattuhit sámegiela, vuoruhuvvojit.
• Doaibmabijut mánáid, nuoraid ja nuorra rávesolbmuid várás vuoruhuvvojit.
• Váldonjuolggadus lea, ahte ii addojuvvo doarjja ovddidit vuovdaleami.
• Váldonjuolggadus lea, ahte ii addojuvvo doarjja oassálastit semináraide, ohppui, oahppomátkkiide ja sullasaččaide.
• Dábálaččat ii addojuvvo doarjja dábálaš doibmii.
• Dábálaččat ii addojuvvo doarjja oastit biergasiid dahje dahkat eará investeremiid.
• Vuolggasadji lea, ahte ruđat eai juolluduvvo doaibmabijuide mat leat árvvoštallojuvvon dahje gullet fylkkagieldda eará veahkke- dahje doarjjaortnegiid vuollai.  
• Doarjaga alimus ohcansubmi lea kr 50 000. 

Ohcamuša galgá sáddet elektrovnnalaččat ohcanskovi bokte, mii lea fylkkagieldda neahttasiidduin. Ohcamušas galgá leat:

• Doaibmabiju ulbmila válddahus
• Doaibmabiju geográfalaš guovlu
• Doaibmabiju čađaheami áigeplána
• Plánejuvvon aktivitehtaid válddahus
• Bušeahtta mii oktiivástida aktivitehtaiguin
• Ruhtadanplána oktan ohcci iežasosiin ja vejolaš eará ruhtadangálduiguin
• Doaibmabiju ulbmiljoavkku(id) válddahus, ja velá válddahus mo ohcci áigu olahit ulbmiljoavkku(id)
• Ohcci ovdehusat/gealbu čađahit doaibmabiju
• Vejolaš ovttasbargoguimmiid oppalaš geahčaldat

Plánejuvvon ovttasbargu galgá duođaštuvvot soahpamušaid, mearrádusaid, áigumušjulggaštusa dahje dakkáriid bokte.

Juos ohcá doarjaga earáin go fylkkagielddas, de ferte muitalit ohcamušas geat dát leat. Juos earát leat juo juolludan doarjaga, de ferte dokumentašuvnna dán hárrái bidjat ohcamuša mielde.

Ohcamuš árvvoštallojuvvo dieđuid vuođul maid ohcci lea čállán ohcanskovvái. Buot áššáiguoskevaš dieđuid mat jerrojuvvojit njuolggadusain, galgá bidjat ohcamuššii.

Ohcamušat mat bohtet sisa maŋŋá ohcanáigemeriid, ohcamušat mat leat dievasmeahttumat dahje ohcamušat mat eai gula ortnega siskkabeallai, eai sáhte vuordit áššemeannuduvvot, ja dat hilgojuvvojit.

Vuosttas ohcanáigemearri lea golggotmánu 1. beaivvi 2024.

Loga dárkilit teavstta mii lea dán siiddus, ovdalgo sáddet ohcamuša. Fuomáš ahte ohcamušat álgovuođus leat almmolaš dokumeanttat, mat almmuhuvvojit TFFK almmolaš journálas.

Ohcamušat árvvoštallojuvvojit muttolaččat mearriduvvon eavttuid mielde ja ollislaš oaidninsajis. Mearrádusa dahká fylkkaráđi lahttu gii lea vásttolaš kultuvrra ovddas, áššemeannudeaddji dahkan mearrádusevttohusa mielde. Buohkat ožžot čálalaš mearrádusreivve nu fargga go áššemeannudeapmi lea loahpahuvvon.

Mearrádusa sáhttá váidalit hálddašanlága § 28 mielde. Váidalusa galgá sáddet čálalaččat fylkkagildii 3 vahku siste dan dihto áiggi rájes go lea váldán vuostá dieđáhusa mearrádusa hárrái, vrd. hálddašanlága §:in 29. Gáibádusat váidalusa hámi ja sisdoalu dáfus leat dárkilastojuvvon hálddašanlága §:s 32. Juos fylkkagielda bisuha mearrádusas maŋŋilgo váidalusa lea vuostáváldán, de sáddejuvvo váidalus fylkkagieldda váidalanlávdegoddái. Váidalanlávdegotti mearrádus lea loahpalaš.

Fylkkagielda máksá doarjaga buvttarehkega vuođul. Ohccit geaidda juolluduvvo doarjja, galget sáddet buvttarehkega fylkkagildii almmá ákkahis áji haga maŋŋilgo mearrádusreivve leat vuostáváldán, ja maŋimustá áigemeari siste mii lea biddjojuvvon mearrádusreivves.

Loga mo sáddet fáktura/buvttarehkega dáppe

• Doarjja galgá geavahuvvot nugo lea válddahuvvon ohcamušas, ja eavttuid mielde mat leat dieđihuvvon juolludusreivves.
• Juos doaibmabidju, bušeahtta dahje áigeplána rievdaduvvo mearkkašahtti mađe, de galgá das čálalaččat sohppojuvvot fylkkagielddain. Rievdadusaid ferte fylkkagielda dohkkehit. Juos leat dahkkojuvvon mearkkašahtti rievdadusat almmá čálalaččat soabatkeahttá fylkkagielddain, de sáhttá doarjja gáibiduvvot máksojuvvot ruovttoluotta.
• Juos doarjjaruđat eai geavahuvvo eavttuid mielde, dahje juos doarjja lea addojuvvon ohcci boasttudieđuid vuođul, de sáhttet ruđat gáibiduvvot máksojuvvot ruovttoluotta, ollásit dahje osohahkii.
• Doarjjavuostáváldi seahtá dovddusin dahkat, ahte doaibmabiju lea fylkkagielda dorjon. Fylkkagieldda logo galgá oainnusmahttojuvvot dieđihanávdnasiin, mat máŧolaččat ráhkaduvvojit doaibmabiju várás. Viečča TFFK logo dáppe.

• Rehketdoallu ja raporta doarjaga geavaheamis galgá sáddejuvvot fylkkagildii maŋŋilgo doaibmabidju lea čađahuvvon, ja maŋimustá guovvamánnu 1. beaivvi jagi maŋŋilgo lea juolluduvvon.
• Raporta galgá sisdoallat válddahusa das, makkár (aktiviteahtat) leat dahkkojuvvon ja geat leat olahuvvon prošeavtta bokte. Juos doarjja lea addojuvvon kursii, doaluide dahje sullasaččaide, de ferte dieđihit man gallisgo lea oassálastán.
• Rehketdoallu galgá čájehit, mo doarjja lea geavahuvvon, ja biddjojuvvot nu ahte sáhttá veardádallojuvvot bušeahtain mii lea sáddejuvvon sisa.
• Váilevaš raporteren sáhttá mielddisbuktit, ahte doarjja gessojuvvo ruovttoluotta ja gáibiduvvo máksojuvvot ruovttoluotta.

Raporta ja rehketdoallu sáddejuvvo e-poastta mielddusin postmottak@tffk.no.

Rudat Finnmárkku sámi ulbmiliidda - doarjjaortnega njuolggadusat 17.1.2023 (PDF, 790 kB)

Reija Marianne Lång

Ráđđeaddi, dáidda- ja kulturovdánahttin

Sádde e-poastta čujuhussii reija.laang@ffk.no.

Telefovdna: 78 96 32 11