Go leat fidnooahppi de galgá dus leat bargošiehtadus fitnodagain ja dohkálaš oahppošiehtadus. Oahppošiehtadus lea geatnegahtti soahpamuš gaskal du guhte leat fidnooahppi ja oahppofitnodaga oahppoáigge guhkkodagas. Go dát šiehtaduvvon oahppoáigi lea nohkan, de ii leat šat oahppofitnodagas geatnegasvuohta addit dutnje oahppu. 

Oahppofitnodat álggaha oahppošiehtadusa Vigo bedrift:s ja sádde dan elektrovnnalaččat fylkkagildii. Go fylkkagielda lea meannudan šiehtadusa, dat sáddejuvvo elektrovnnalaš vuolláičállimii. Boahtá dutnje SMS vuolláičállima birra. Lea dehálaš ahte vuolláičálát ovdal go áigemearri dievvá.

Bargošiehtadus mudde earet eará bargoáiggi ja bálkká. Bargošiehtadus galgá bistit seamma guhká go oahppošiehtadus. Jus áiggut joatkit fitnodagas maŋŋel go leat gárven oahppoáiggi de ferte dahkot ođđa bargošiehtadus.

Du lagamus doarjjaolmmoš oahppofitnodagas lea fágalaš jođiheaddji ja bagadalli. Sii galget ovttas bearráigeahččat ahte fidnooahppit fidnejit dan oahppu masa sis lea riekti. Oahppodirektoráhta neahttasiidduin gávnnat evttohusaid mo fitnodagat sáhttet plánet ja čađahit oahppu, dáppe gávnnat maiddái nationála oahppoplánaid.

Oahppoplánat Oahppodirektoráhta neahttasiidduin

Jahkebealsagastallan

Fidnooahppin dus lea riekti čađahit jahkebeallesagastallama fágajođiheaddjiin ja/dahje bagadallin. Jahkebeallesagastallan galgá dutnje veahkkin ovdánit ja vuođđun plánet oahpu viidáset. Siskkáldas plána oahppamii lea sagastallama vuolggasadjin, muhto soaitá buorre jurdda sagastallat loaktima, jávkama, bargodoaimmaid ja oahppanmovtta birra maid.

Hástalusat oahppoáiggis 

Jus dus šaddet váttisvuođat fitnodagas gos leat fidnooahppin de lea dehálaš ahte jođánit muitalat dan fágajođiheaddjái, bagadallái dahje bearráigeahččái. Sáhtát maid gulahallat joatkkaskuvlla fágaoahppokoordináhtoriin oažžut rávvagiid ja bagadallama.

Jus du fitnodat lea muhtin oahppokantuvrra miellahttun de sáhtát maid singuin gulahallat. 

Juohke oahppofitnodagas galgá siskkáldas plána mii čájeha guhte bargodoaimmat dus galget leat vai juvssat oahppoplána gelbbolašvuođamihtuid. Plána čájeha maiddái goas bargodoaimmaid galgá čađahit ja geas lea ovddasvástádus čuovvoleapmái. Jahkebealárvvoštallan ja dáhtonat jahkebealsagastallamiidda berrejit maiddái leat plánas.

Fidnoohppiid bálká sáhttá rievdadallat das guđe fágain barggat ja lea go fitnodat organiseren dahje ii. Jus don barggat fitnodagas mas lea tariffašiehtadus, de lea ráhkaduvvon sierra bálkámearit fidnoohppiide. Jus don barggat fitnodagas mas ii leat tariffašiehtadus sáhttá bálká rievdadallat fitnodagas fitnodahkii.

Oahppoáigi eanaš fágain lea guokte jagi, gos dat vuosttaš jahki lea oahppojahki ja maŋimuš árvohuksenjahkin. Dus lea dušše vuoigatvuohta bálkái oahppoáiggi árvohuksenáigodagas, muhto máŋga fitnodaga juhket bálkká guktui jagiid badjel. Dán vuogi mielde oaččut bálkká olles fidnooahppi áigodaga.

Ovdamearka mo bálkká sáhttá juohkit:

• 1. jahkebealli: 30 % fágabargibálkkás
• 2. jahkebealli: 40 % fágabargibálkkás
• 3. jahkebealli: 50 % fágabargibálkkás
• 4. jahkebealli: 80 % fágabargibálkkás

Du oahppofitnodagas lea geatnegasvuohta dieđihit du geahččaleapmái. Oahppofitnodat galgá dan dahkat guokte mánu ovdal go oahppoáigi lea dievvan. Fylkkagielda dohkkeha ja sádde dieđiheami viidásat fága geahččaleamelávdegoddái.

Dieđiheapmi geahččaleapmái

Oahppofitnodat galgá dieđihit midjiide jus don jávkkat barggus guhkit áigge badjel. Mii ávžžuhat guhkidit oahppoáiggi jus leamaš guhkesáigge jávkan, muhto don ja oahppofitnodat fertebehtet leat ovttaoaivilis rievdademiide.

Jus válddát váhnenpermišuvnna go leat fidnooahppi, de lea dus seamma vuoigatvuohta go eará bargiin.

Oahppošiehtadusa lea vejolaš loahpahit jus goappaš bealit leat ovttaoaivilis. Oahppofitnodat sádde ohcamuša fylkkagildii digitála ohcanskovi bokte.

Jus ehpet leat ovttaoaivilis loahpahit oahppodili de ferte ohcan loahpaheami birra ja duođaštus sáddejuvvot fylkkagildii. Oahppofitnodat ferte duođaštit manne šiehtadus berre loahpahuvvot. Dos oaččut vejolašvuođa buktit cealkámuša ovdal ohcamuš sáddejuvvo viidáset meannudeapmái. 

Go oahppošiehtadus ja oahppoáigi loahpahuvvo ovdal oahppoáigi dievvá, de fylkkagielda sádde dutnje gelbbolašvuođaduođaštusa ja bargoduođaštusa oahppofitnodagas.