Finnmárkku fylkkagielda iluin bovde vuosttaš jahkásaš kulturkonferánsii maŋŋá Romsa ja Finnmárku sirrema. Mii háliidit čohkket ásahusaid, eaktodáhtolaččaid, ámmátlaččaid, organisašuvnnaid ja gielddaid guovtti movttiidahtti beaivái gos beasat oahppat ollu ja mas ovttasbargu ja fierpmádathuksen leat guovddážis.
Konferánsa lágiduvvo skábmamánu 18. ja 19. beaivvi Scandic hoteallas Álttás, ja prográmmas lea máŋggabealat sisdoallu.
Dán jagáš fáddá lea Kultuvra hukse servodaga ja mii áigut dutkat kultuvrra fámu daid buriid váikkuhusaid bokte mat kultureallimis leat báikegottiide, sihke bajimuš dásis ja konkrehta prošeavttaid bokte. Ovdanbuktimiid ja panelaságastallamiid bokte maiddái guoskkahit áigeguovdilis fáttáid nugo gearggusvuođa, duohtavuođa- ja soabadankommišuvnna raportta čuovvoleami, kultuvrra iešguđet doarjjaortnegiid ja eará.
Kultursuorggi sadji servodatovdáneamis
Inspirašuvdnan dán jagáš fáddái lea raporta Kultursuorggi sadji servodatovdáneamis mas leat kárten, KS gohččuma olis, dutkamušaid dan birra ahte man ollu kultuvra mearkkaša ovttaskas olbmuide ja servodahkii, ja mii kultuvrra rolla lea servodatovdáneamis. Mii leat ožžon duođaštusa ahte prošeaktajođiheaddji Karin Ibenholdt Samfunnsøkonomisk Anallyse:s boahtá konferánsii ja áigu ovdanbuktit raportta.