Buohkain lea riekti geahčadit álmmolaš dokumeanttaid, áššebáhpáriid, journálaid ja eará registariid jus ii leat eará mearriduvvon lágas/láhkaásahusas.  

Dus lea liikká dušše vuoigatvuohta geahčadit diehtovuođu jus dieđuid lea álki ohcat. Dokumeanttat eai gávdno dušše bábirhámis. Diehtojuohkin ovdamearkka dihtii e-poastta ja SMS bokte sáhttá leat dokumeanta lága mielde.

Ii leat gáibádus ahte sus gii bivdá geahčadeami galgá leat áššálaš beroštupmi. Geahčadangáibádus ferte dattetge gustot dihto áššái, dahje govttolaš muddui dihto áššiide.

Sáhtat dáid dokumenttaid geahčadit: 

• Áššelisttu dahje áššebáhpáriid fylkkadikkis dahje eará fylkkagieldda álbmotválljejuvvon orgánain
• Áššebáhpáriid bearráigeahččanlávdegottis, váiddalávdegottis dahje fylkkagieldda revišuvnnas
• Áššebáhpáriid hálddahusa ovttadagain main lea iehčanas mearridanváldi áššis masa guoská áššebábir

Muhtomin ii leat geahčadanvuoigatvuohta, earret eará:

• Fylkkagielddas lea geatnegasvuohta biehttalit geahčadeami dakkár dieđuide mat leat jávohisvuhtii čadnojuvvon (omd. Persovnnalaš dearvvašvuođadieđut) 
• Fylkkagielda sáhttá biehttalit geahčadeami siskkáldas dokumeanttaid ja dokumeanttaid mat leat vižžon olggobealde siskkáldas áššemeannudeami várás (omd. dokumeanttaid virgáibidjanáššiin, diggeáššebáhpiriid, soahpamuššiehtadallamiid dokumeanttaid jna).