Fysihkalaš doaibmabijuide čáhcádagain, mat sáhttet váikkuhit guliid ja eará sáivaealániid buvttadanvejolašvuođaid, ferte oažžut lobi fylkkagielddas dahje stáhtahálddašeaddjis láhkaásahusa mielde fysihkalaš čáhcádatdoaibmabijuid hárrái.
Fylkkagielddas lea ovddasvástádus doaibmabijuin čáhcádagain, gosa eai gorgŋe anadromalaš luossaguolit dahje gos eai leat reappát. Juos áššáigullevaš čáhcádatgaskkas leat sáivaguollešlájat dahje -máddodagat, main fylkkagielddas ii leat hálddašanovddasvástádus, de galget mearrádusat dahkkojuvvot ovttasráđiid stáhtahálddašeddjiin.
Láhkaásahus fysihkalaš čáhcádatdoaibmabijuid hárrái, § 1 (Gielddus doaibmabijuid álggaheami vuostá čáhcádagain)
Almmá stáhtahálddašeaddji dahje fylkagieldda lobi haga ii leat lohpi álggahit:
- Fysihkalaš doaibmabijuid mat mielddisbuktet dahje sáhttet mielddisbuktit, ahte guliid dahje eará sáivačáhceealániid buvttadanvejolašvuođat fuotnánit,
- Fysihkalaš doaibmabijuid čáhcádagain ja čáhcádatgáttiin, dán vuolde šielmmáid huksen, guollečiekŋalasaid roggan ja stuorát geđggiid bidjan, mat sáhttet lasihit guollesállaša báikkis dahje sirdit guollesállaša čáhcádagas, ja
- Fysihkalaš doaibmabijuid anadromalaš luossaguliide dahje sáivaguliide, maid áigga lea nuppástuhttit ovtta dahje máŋgga šlája buvttadeami, máddodatsturrodaga dahje lávdama.
Gielddus a ja b mielde gusto beroškeahttá doaibmabiju áigagis. Gielddus a ja b mielde ii gusto juos doaibmabidjui gáibiduvvo doaibmalohpi čáhcádatregulerenlága dahje čáhceresursalága mielde.
Stáhtahálddašeaddjis lea ovddasvástádus doaibmabijuin čáhcádatgaskkain gosa gorgŋejit anadromalaš luossaguolit dahje gos leat reappát.
Oza lobi fysihkalaš doaibmabijuide čáhcádagain
Fylkkagielda lea ráhkadan sierra ohcanskovi oainnálmahttin dihtii makkár dieđuid dárbbaša addit go ohcá lobi fysihkalaš čáhcádatdoaibmabijuid láhkaásahusa mielde. Dieđuid doaibmabijuid hárrái čáhcádatgaskkain gosa eai gorgŋe anadromalaš luossaguolit dahje gos eai leat reappát, galgá sáddet deike:
postmottak@ffk.no dahje
Finnmárkku fylkkagielda, Pb. 701, 9815 Čáhcesuolu/Vadsø
Ohcanskovi gávnnat dáppe (PDF, 102 kB)