Movt galgá ohcat?

Buot ohcamušat sáddejuvvojit elektrovnnalaččat ja neahttasiiddu anleggsregisteret.no bokte.

Doppe gávnnat visot maid dárbbašat diehtit ohcanproseassa birra, ja maiddái mearrádusaid doarjaga hárrái rusttegiidda valáštallama ja rumašlaš lihkadeami várás.  

Buorre proseassa lea deaŧalaš go galgá buktit nu buorre ohcamuša go vejolaš. Go áiggut čálligoahtit ohcamuša, de lea deaŧalaš ahte válddát vuos oktavuođa suinna gii lea ášši ovddasvástideaddji du iežat gielddas.  

Deaŧalaš fuomášit:

• Iešguhtege gieldda ohcanáigemeari mearrida gielda ieš.  
• Buot dábálaš rusttegat maidda ohccojuvvojit spealloruđat, galget leat namahuvvon gieldda plánas mas lea valáštallama ja rumašlaš lihkadeamis sáhka.
• Ohcamuš galgá ovddiduvvot maŋimustá ohcanjagi maŋŋilgo rusttet lea gárvánan.  
• Áigemearri čoahkis sáddet gieldda spealloruhtaohcamušaid fylkkagildii lea ođđajagimánu 15. beaivi.
• Kulturdepartemeanta mearrida juogadeami ráma miessemánus juohke jagi.
• Fylkkagielda juohká juolluduvvon ruhtameari ja dieđiha ohcciide bohtosa hárrái suoidnemánu 15. beaivvi maŋimustá. 

Geat sáhttet ohcat?

Spealloruđaid ohccit dábálaš valáštallanrusttegiid várás sáhttet leat:

• Gielddat ja fylkkagielda
• Valáštallanjoavkkut mat gullet Norgga Valáštallanlihtu (NIF) ja Sámi Valáštallan Lihtu (SVL) vuollai
• Ovttastusat mat leat organiserejuvvon Norgga Bivdi- ja Oaggulihtu (NJFF), Eaktodáhtolaš Báhččibálvalusa ja Norgga Biilagilvolihtu vuollásažžan.
• Oasussearvvit, ovttasdoaibmafitnodagat, vuođđudusat ja eará ovttastusat main leat njuolggadusat mat devdet organisašuvdnahámi eavttuid - geahča mearrádusaid neahttasiiddus geahča mearrádusaid neahttasiiddus regjeringen.no
• Ovttastusat mat leat organiserejuvvon Olgunastinráđiid Riikkasearvvi, Oslovuona Olgunastinráđi ja Norgga Olgunastineallima vuollásažžan, sáhttet ohcat doarjaga olgunastineallinrusttegiidda
• Norgga Kennel Klubba ja buđaldanklubbat mat leat organiserejuvvon klubba vuollásažžan sáhttet ohcat beanagilvorusttegiidda 
• Norgga Meahccesihkkelastima Organisašuvdna ja ovttastusat mat leat organiserejuvvon organisašuvnna vuollai sáhttet ohcat doarjaga sihkkelrusttegii 

Masa sáhttá ohcat ruđaid?

• Hukset ja divvut valáštallanrusttegiid, olgunastineallinrusttegiid ja lagasbirasrusttegiid mat leat rahpasat dábálaš valáštallandoaimmaide dahje iežas organiseren buđaldemiide, ja mat eai gula gávppálaš beroštumiid vuollai.
• Boares valáštallanrusttegiid universála hábmemii
• Oastit ja bierggastit dáláš rusttegiid

Reaiddut rusttegiid plánema ja doallama várás  

Don sáhtát gávdnat dieđuid buriid valáštallanrusttegiid plánema, prošekterema, huksema ja doallama hárrái ja iešguđet bagadallamiid valáštallanrusttegiid hárrái neahttasiiddus godeidrettsanlegg.no (buorit valáštallanrusttegat).

Juohke rusttetmálle várás gávnnat earret eará teknihkalaš gáibádusaid, plánačoavddusevttohusaid, ávnnasválljemiid, dutkanartihkkaliid ja buriid referánsaprošeavttaid válddahusa.

Gielda ja fylkkagielda máhttá neavvut plánema hárrái juos dat dárbbašuvvo.  

Fylkkagielddas leat čuovvovaš ovddasvástádusat  

• Dieđu ja máhtu gaskkustit valáštallanrusttegiid ja ruhtadanortnegiid hárrái
• Joavkkuid/servviid ja gielddaid spealloruhtaohcamušaid meannudit
• Bagadallat sin geat ohcet spealloruđaid rusttegiidda valáštallama ja rumašlaš lihkadeami várás ja maiddái ođđa rusttegiid plánemii ja oapmerusttegiid divvumii
• Spealloruđaid juolludit 
• Spealloruđaid máksit

Sámegillii ođasmahttojuvvon: 18.07.2025

Samisk versjon oppdatert: 18.07.2025