Duogáš: 

Áigumuš “Nuorra Gáŋgaviikkas” prográmmain lea oččodit searvadahttima ja searvevuođa mánáid ja nuoraid gaskkas oktasaš beaivemállásiid bokte skuvllas. Čilgejuvvo ahte lea lassáneaddji treanda ohppiid gaskkas ahte eai borat, ostet eahpedearvvašlaš borramuša ja eai borat ovttas. Geahpes gitta muttát silolaš gillámušaid dikšun jurddavirusprográmma (tankevirusprogram) bokte. Seamma friddjaáiggi buohkaide. Mii háliidit buoridit friddjaáiggearenaid nu ahte eanet mánát ja nuorat válljejit searvat.  

Buđaldeapmi:

• Oktasaš nuvttá beaivemállásat skuvllas mii deattuha searvadahttima
• Fallat “Tankevirus”-prográmma ulbmiljovkui
• Hálddašit ruđaid “seamma astoáigái buohkaide” bargui

Maid mii áigut olahit 2027 rádjai?

Prošeavtta váldoulbmil lea ovddidit mánáid ja nuoraid searvadahttima, ráhkadit arenaid sosiála searvevuhtii, ja váikkuhit dasa ahte eanet mánát ja nuorat válljejit dearvvašlaš ja álbmás borramuša.  Mii háliidit láhčit dili searvevuhtii rastá kultuvrraid, našuvnnaid ja nannet searvvadahttima gaskal mánáid ja nuoraid. Mii maid háliidit eastadit ulbmiljoavkku psykalaš/silolaš gillámušaid dan bokte ahte addit sidjiide bargoneavvuid prográmma “Tankevirus” bokte. 

Duogáš

Oadjebas Guovdageainnus leat golbma váldodoaibmabijut

1) Gealbolokten 

2) Ságastallanjoavkkut 

3) Oadjebas arena mánáide ja nuoraide

Dát čuoggát deattuhuvvojit go suohkan oaivvilda ahte doaibmabijut veahkehit eastadit veahkaválddálašvuođa, illasteami, psyhkalaš gillámušaid, gárrenmirkogeavaheami ja iešsoardima. Mii háliidit ahte buot nuorat galget vásihit ahte bajásšaddet oadjebas ja fátmmasteaddji báikegottis gos sin jietna ja váikkuheapmi mearkkaša juoidá.

Buđaldeapmi

Giđđat 2025 rahpá Guovdageainnu suohkan nuoraidklubba Guovdageainnus. Dát lea vuosttašceahkkefálaldat maid nuorat ieža leat leamaš mielde hábmemin.

Nuoraidklubba sisdoallu: 

• Goarrunmašiinnat. Gáhttet sámi duodjekultuvrra, ráhkadit buolvvaidgaskasaš deaivvadanbáikkiid gos árbevieruid fievrrideapmi lea guovddážis. Duodji lea hui dehálaš Guovdageainnus. Suohkan vásiha ahte olbmot rahčet rahpamiin dakkár dilálašvuođain gos lea vejolašvuohta háleštit (ságastallandiimmut nugo psykologa, doavttir, sosionoma jna.), muhto jus lea juoga lágan doaibma gos duodji lea guovddážis, de dat lea ollu álkit máŋgasiidda. 
• Árkadaspealla-mášiinnat. Lassin rabas kulturvissui gos nuorat leat guovddážis. Dás lea oppalaš álbmotdearvvašvuođa fokus, dan sadjái go dušše deattuhit sámi dearvvašvuođa.
• Kinoprojektor ja popcorn-mašiidna. Dahkat dakkár birrasa mas guovddážis lea deaivvadit sosiálalaččat kino bokte ja láhčit dili dasa ahte geahččat ii dušše eanetlohkofilmmaid, muhto maiddái sámi filbmamaratoniid dahje filbmafestiválaid nuoraiguin/nuoraide. Sámi bealli boahtá ovdan go dákkár oastimis sáhttá áŋgiruššat sámegiela bisuheami ektui go fállá filbmafálaldagaid sámegillii.

Maid mii háliidit olahit jagi 2027 rádjai?

Guovdageainnu suohkan áigu bargat laktit guhtta elemeantta álbmotdearvvašvuođadieđáhusas sápmelaččaid ja sámi álbmoga eallineavttuid birra dán prográmmabargui:

1. Ovddidit buriid eallineavttuid sámi álbmogii
2. Fátmmastit sámi perspektiivvaid álbmotdearvvašvuođapolitihkkii
3. Álbmotdearvvašvuođabargu ovddidan dihtii buori psyhkalaš dearvvašvuođa ja eallinárvvu
4. Ovddidit dearvvašlaš eallinvieruid ja dearvvašvuođaovddideaddji birrasa
5. Nannet sámi álbmoga máhtolašvuođa álbmotdearvvašvuođa ja birgenlági hárrái
6. Ovddidit ovttasbarggu riikkarájáid rastá sámi álbmoga dearvvašvuođa hárrái

• Nannet nuoraid mielváikkuheami oppalaččat
• Psyhkalaš dearvvašvuođaovddideapmi fáddán sierra nuoraidseminárain ja fáddábeivviin skuvllas
• Ráhkadit arenaid gos nuorat besset čájehit álbmogii maid sii leat oahppan kurssain ja muđui

Duogáš

Muosáid gieldda ulbmilat leat ráhkaduvvon Dearvvašvuođadirektoráhta ulbmiliid vuođul. Dain leat gárgeduvvon golbma doaibmabiju mat galget ráhkadit buriid ovttasbargovieruid báikkálaš servodaga iešguđet oassádalliide addin dihtii nuoraide mávssolaš árgabeaivvi.

Buđaldeapmi

Bargoeallinfága:

Muosáid gielda lea čađahan "bargoeallinfága" nammasaš doaibmabiju. Bargoeallinfága lea leamaš ovttasbargu gaskal skuvlla ja ealáhusaid, ja lea láhčán dili addin dihtii nuoraide vejolašvuođaid báikkálaš bargo- ja ealáhuseallimis. 8.-10. cehkiid oahppit leat ožžon vejolašvuođa válljet bargoeallinfága čiekŋudanfágan. Oahppit leat leamaš bargohárjehallamis ja leat ožžon bagadallama fitnodagas golbma diimmu vahkus. Doaibmabidju lihkostuvai nu bures ahte Muosáid gielddas dál lea bargoeallinfága mielde oahppoplánain, gieldda plánain ja bušeahtain.

Fágaidrasttideaddji joavku:

Fágaidrasttideaddji bargojoavkkut galget ovttasdoaibmat addin dihtii nuoraide eanet olámuttolaš ja einnostahtti fálaldaga.

Viiddiduvvon fágaidrasttideaddji joavkkus, mas leat mánáidsuodjalus, PPB [pedagogalaš-psykologalaš bálvalus], dearvvašvuođadivššár, skuvla, mánáidgárdi, politiija, nav, friijaáiggejođiheaddji, psyhkalaš dearvvašvuohta ja doavttir mielde, čoahkkinastet oktii jagis, dahje go lea earenoamáš dárbu.

Galgá ráhkaduvvot diehtogihpa iešguđet bálvalusaid birra maid gielda sáhttá fállat. Dat galgá leat gávdnamis sosiála mediain ja báberhámis.

Nuorat – astoáiggefálaldagat:

Nuoraidráđđi galgá ovttas nuoraidklubbain ja joavkkuiguin ja servviiguin kártet nuoraid astoáiggefálaldagaid, dasto ovddidit ja álggahit doaibmabijuid.  Astoáiggefálaldagaid kárten lea ain plánejuvvomin. Dan oktavuođas galgá ráhkaduvvot filbma.

Maid mii háliidit olahit jagi 2027 rádjai?

Muosáid gielda áigu bargat váhnenrollain gárrenávdnasiid eastadanbarggus gielddas. Dál atnet 50 proseantta Muosáid gieldda nuorain astoáiggeklubba. Máŋggabealat fálaldagain mii háliidit geasuhit vel eanet nuoraid mielde. Klubba fálaldagat ollet dobbelii go dušše fysihkalaš lanjaide, ja nuoraide fállat oaggunmátkkiid, paintballgilvvuid, bulljarakkisspábbačiekčamiid, grillemiid, idjadanmátkkiid.

Mii háliidit maiddái movttiidahttit eanet nuoraid searvat joavkkuide ja servviide, valáštallanservviide, bivdui ja guolásteapmái, beanaklubbii ja sullasaččaide.

Duogáš

Nuoraiddiehtoguorahallan čájeha ahte Porsáŋggu nuorat váillahit sosiála deaivvadanbáikkiid ja eanet nuoraid buđaldemiid. Máŋggas atnet iežaset oktonassan, rahčet garra deaddaga vuolde ja iešguđetlágan psyhkalaš gillámušaiguin. Dasa lassin lea negatiiva treanda narkotihkkageavaheami dáfus, ja maiddái alkohola geavaheami dáfus.

Mii giddet fuopmášumi eastadeapmái, ja danne galgá doaibmabidju Nuorat fokusis láhčit sosiála deaivvadanbáikkiid ja buđaldemiid, bargat nuoraide mielváikkuheami gielddas ja bargat miellaguottuid ovddidemiin nuoraid ja váhnemiid ja ovddasteddjiid várás. Dát bargu galgá leat ráhkaduslaččat vuođđuduvvon gildii.

Buđaldeapmi

Doaibmabijus Nuorat fokusis leat sierra buđaldanfálaldagat nugo geassemátki gizzunpárkii, beanavuodjinkursa ja paintball. Dasa lassin bargojuvvo sihkkarastit vahkkosaš deaivvadanbáikki nuoraide gos sii sáhttet servvoštallat ja gos sáhttet gávnnadit oadjebas rávesolbmuiguin astoáiggisteaset. Galgá maid leat deaivvadanbáikefálaldat gos leat heivehuvvon dilálašvuođat rumašlaš lihkadeapmái.

Porsáŋggus lea valjis luondu ja meahccemátkkit leat lunddolaš oassi olbmuid árgabeaivvis. Almmatge lea divrras oastit alcces biergasiid, ja danne sáhttá dál luoikkahit maid dárbbašeš geahppa beaivemátkkiide dahje idjadanmátkkiide meahcis.

Buorre ovttasbargu skuvllaiguin lea deaŧalaš go galgá fátmmastit 24 diibmosaš nuoraid, ja mii ovttasbargat skuvllaiguin lágidit psyhkalaš dearvvašvuođa guovdilastinvahku iešguđetlágan fáttáiguin mat bistet olles vahku. Guovdilastinvahkus leat lágideamit sihke skuvlaáigge ja maŋŋelgaskabeaiáigge. Gielda lea lágidan psyhkalaš dearvvašvuođa guovdilastinvahku ja fidno- ja oahppomeassu.

Maid mii háliidit olahit jagi 2027 rádjai?

Okta deaŧalaččamus ulbmiliin lea rahpat nuoraidklubba. Nuoraid lunddolaš deaivvadanbáiki ráhkada buđaldemiid, sosiála oktavuođa ja oadjebasvuođa Porsáŋggu nuoraide geat dáppe besset gávnnadit gaskaneaset ja oadjebas ollesolbmuiguin astoáiggis. Dákkár fálaldat eastadivččii hástalusaid mat bohtet ovdan Nuoraiddiehtoguorahallamis 2021 (PDF), ja maiddái ahte das lea juoga maid nuorat váillahit.

Nuoraid mielváikkuheapmi sihkkarastá báikegotti gos lea buorre leat nuorra. Danne galgá nuoraidráđđi lea doaibmilis politihkalaš orgána mii guldaluvvo áššiin mat gusket nuoraide. Sii galget leat árjjalaččat ja oažžut vejolašvuođa máŋgga dásis beroštit ja searvat. Galgá maiddái sihkkarastojuvvot ahte nuorat ja nuoraid perspektiivvat ovttaidahttojuvvojit plánemii ja hálddašeapmái. Porsáŋgu háliida joatkit psyhkalaš dearvvašvuođa ja guovdilastinvahkuin ja fidno- ja oahppomeassuin.

Duogáš

Nuoraiddiehtoguorahallama (PDF) oktavuođas boahtán ovdan ahte gielddas leat hástalusat givssideami, psyhkalaš dearvvašvuođa ja oktonasvuođa hárrái. Danne bargojuvvo nuoraid givssideami ja oktonasvuođa eastademiin ja psyhkalaš dearvvašvuođa buoridemiin Deanu gielddas.

Ulbmil lea oažžut buoret váhnensearvama nuoraid árgabeaivái. Mánáid ja nuoraid mielváikkuheapmi earret eará gieldda nuoraidráđi bokte, lea vuoruhuvvon.

Buđaldeapmi

Mii leat álggahan Rabas arena čoahkkananbáikin vuođđoskuvlla nuoraidceahki nuoraide dakka maŋŋil skuvlaáiggi. Fálaldat lea duorastagaid diibmu 14.00 rájes diibmu 17.00 rádjai, ja das ožžot oahppit nuvttá borramuša. 

Dát dáhpáhuvvá astoáiggeklubba Grotta lanjain gielddaguovddážis. Fálaldat lea bures váldojuvvon vuostá. Dat lea maiddái mielváikkuhan dasa ahte nuoraidklubba, mii rahpasa dakka maŋŋelaš go Rabas arena lea giddejuvvon, šaddá leat eambbo anus.

Deanu guovddážii lea ráhkaduvvon buđaldanpárka. Dán proseassas mielváikkuhedje mánát ja nuorat viidát buđaldanpárkka sajusteami ja apparáhtaid válljema hárrái. 

Deanu gielda áigu bargat váhnenrollain gárrenávdnasiid eastadanbarggus gielddas. Doaibmabidjoprošeakta lea maiddái álggahan ovttasbarggu Deanu fysikálain gos galgá fállojuvvot nuvttá hárjehallan bagadallamiin guktii vahkus. Dás giddejuvvo maiddái fuopmášupmi dearvvašlaš bibmui.

Nuoraiddiehtoguorahallama leat oaidnán ahte sullii 20 proseantta nuorain Deanus leat heaitán astoáiggebuđaldemiin koronaheahtedili áigge. Nuoraidráđđi lea árvvoštallan dán fálaldaga ja lea gávnnahan ahte dat lea buorre fálaldat nuoraide. Dát šaddá ođđa deaivvadanbáikin mii sáhttá dagahit buoret oktavuođa ja uhcit oktonasvuođa nuoraid gaskkas.

Maid mii háliidit olahit jagi 2027 rádjai?

Deanu gielda áigu joatkit doaibmabijuiguin mat leat čájehan buorrin nuoraid oassálastimii nuoraidráđđái, astoáiggebuđaldemiide ja deaivvadanbáikkiide. Ain galgá bargojuvvot nuoraid mielváikkuhemiin sihke doaibmabidjoprošeavttas ja eará surggiin.

Duogáš

Vuogádatlaš álbmotdearvvašvuođabarggu bokte Álttá suohkanis lea fuopmášuvvon ahte mis leat vuollegis boađuslogut ollu surggiin main leat mánát ja nuorat mielde. Máŋga nuora dovdet iežaset oktonassan, ja nuoraidskuvllas dieđihit heajut loaktima, eambbosiid geat vásihit givssideami, ja oppalaččat eanet nuorat muitalit iežaset rahčat psyhkalaš dávdamearkkaiguin ja gillámušaiguin.

Buđaldeapmi

Áltá lea válljen guokte doaibmabiju: Máhttinkursa skuvllas ja áŋgiruššan deaivvadanbáikkiid beales mánáide ja nuoraide.

Máhttinkurssa vuođđu lea árjjalaš oassálastin, ja dat sisdoallá kognitiiva hárjehusaid. Dát čađahuvvo Buori niehku kursalágideddjiin, gii čađaha guokte olles beaivvi buot bargiiguin daid skuvllain ja mánáidgárddiin maidda mii fállat dán.

Bargit geavahit dasto hárjehusaid struktuvrralaččat diimmuin, nugo jaskatvuođahárjehusaid, huššageahpideami veallut máhtá alde, nubbi nuppi ruvvema, smiehttanságastallamiid ja eará hárjehusaid. Buohkat geat leat čađahan oahpu, leat hui duhtavaččat buriid ja ođđa reaidduide maid sáhttet geavahit árgabeaivvisteaset.

Nubbi doaibmabidju lea veahkehit buoridit dáláš deaivvadanbáikkiid mánáide ja nuoraide. Konkrehtalaččat leat dál guokte suorggi maidda áŋgiruššan stivrejuvvo: Álttá joatkkaskuvla (AJS) ja Kom Inn (Boađe Sisa) - deaivvadanbáiki Álttá guovddážis.

AJS:s leat sullii 1000 oahppi, ja njealjádas sis bohtet eará báikkiin ja orrot eret ruovttus. Sávvat ahte ásahuvvo fálaldat mas leat gaskabeaivvit guokte beaivvi vahkus, leaksoveahkki, buđaldanbasseaŋga, nuvttá hárjehallan bagadalliin ja ahte fálaldat galgá leat «báiki gos heaŋgalit». Guovlu mii lea jurddašuvvon geavahuvvot leat skuvlla girjerájus ja oktasašviidodagat.

Álttá searvegoddekantuvra doaimmaha Kom Inn (Boađe Sisa), muhto doppe eai dollojuvvo makkárge oskkoldatsártnit. Dat lea deaivvadanbáiki gos fállojuvvojit buđaldeamit. Muhtimin lea almmuhuvvon maid galget hommát daid beivviid, nugo vuojadanmátki, dahje Rukses Ruossa buđaldankursa, eará háviid lea maid nuvttá geavahit neavvuid mat Kom Inn lanjain leat, nug spealuid, tv ja eará biergasiid.

Maid mii háliidit olahit jagi 2027 rádjai?

Mii háliidit máhttinkurssain skuvlet nu ollu oahppoinstitušuvnnaid go vejolaš, ja háliidit ahte deaivvadanbáikkit galget nagadit doallat rabas ja addit bivnnuhis fálaldagaid guoskevaš ulbmiljoavkkuide. Sierra árvvoštallanoassi čuovvu prošeavtta.

Duogáš

Nuoraiddiehto bohtosat čájehit ahte stuorra oassi Várggáid nuorain muitalit ahte sii gillájit sakka oktonasvuođa dihtii. Nuoraiddiehtoguorahallan Várggáin (PDF) čájeha ahte Várggáin leat hástalusat nuoraid gárrenávdnasiid geavaheami geažil. Gielddas lea maiddái hástalusat nuoraid psyhkalaš gillámušaid hárrái.

Buđaldeapmi

Várggáid gielda lea viiddidan nuoraidklubba fálaldaga golmma beaivái vahkus, ja main okta beaivi lea čadnojuvvon vahkkoloahpaide. Nuorat ožžot borramuša, ja vásihusat čájehit ahte borramuš lea doaibmabidju mii čohkke nuoraid. Nuoraidklubba gidde fuopmášumi dearvvašlaš ja lagas borramuššii. Sullii 40-60 nuora geavahit Várggáid nuoraidklubba.

Fáddáeahkedat lágiduvvojit, ja dain giddejuvvo fuopmášupmi psyhkalaš dearvvašvuhtii. Psykiatriijabálvalus ja dearvvašvuođadivššár leat mielde. Gielda áigu lágidit gárrenávnnaskeahtes miessemánu 16. beaivvi doaluid ja juovlabeavddi. Dát galget lágiduvvot ovttasbarggus politiijain, dearvvašvuođadivššáriin, bajásšaddanossodagain ja psykiatriijabálvalusain. Nuorat háliidit buđaldanpárkka gos besset doaimmahit organiserekeahtes rumašlaš lihkadeami ja mii maiddái sáhttá doaibmat deaivvadanbáikin. Dán barggus lea nuoraidráđđi ja Váhnemiid bargolávdegoddi (FAU) mielde. Várggáid gielda áigu bargat váhnenrollain gieldda gárrenávnnaseastadanbarggus.

Maid mii háliidit olahit jagi 2027 rádjai?

Eastadit gárrenvuođa nuorain, eastadit oktonasvuođa ja ovddidit bures loaktima. Várggáid gielda áigu giddet eanet fuopmášumi nuoraid psyhkalaš dearvvašvuođa nannemin. Ásahit arenaid gos oadjebasvuohta ja psyhkalaš dearvvašvuohta lea guovddážis gieldda álbmotdearvvašvuođabarggus.

Duogáš

Mii áigut eastadit oktonasvuođa ja ovddidit gieldda nuoraid bures loaktima. Mii háliidit giddet eanet fuopmášumi biebmodillái ja borramuššii maŋŋá skuvlla ja láhčit dili buot buđaldemiide oadjebas vuogi mielde. Mii áigut maid kártet ja geahčadit makkár vejolašvuođaid mii sáhttit hukset viidáseappot gielddas.

Buđaldeapmi

Mii háliidit viiddidit dáláš nuoraidklubba fálaldaga dearvvašlaš borramušaiguin. Nuorat leat sávvan oažžut speallalansaji nuoraidklubbii, ja speallanbiergasat leat ostojuvvon.

Dasa lassin leat sávvan sierra dolgevuoggačatnanlanja gos nuorat besset oahpahallat čatnat dolgevuokkaid luossabivdui.

Unjárgga gielda áigu bargat váhnenrollain gárrenávdnasiid eastadanbarggus gielddas. Okta doaibmabidju lea doallat fásta eahkediid juohke mánu, maidda láigohit eará fágainstánssaid giddet fuopmášumi psyhkalaš dearvvašvuhtii, biebmodillái, seksuálavuhtii ja eará áššiide.

Eddemannak lea ođđa sámi musihkkafestivála ja áidna sámi musihkkafestivála Nuorta Finnmárkkus. Mii háliidit viiddidit fálaldaga nu ahte festivála maiddái sáhttá addit buori fálaldaga nuoraide.

Maid mii háliidit olahit jagi 2027 rádjai?

Mii áigut láhčit dilálašvuođaid nu ahte váhnemat maid besset searvat eanet klubbii gos sii sáhttet málestit dahje láhčit dilálašvuođaid eará buđaldemiide. Mii háliidit gelbbolašvuođa bajideami bargiide geat leat mielde klubbas. Dasa lassin mii háliidit eanet váhnensearvama ja fátmmastit nuoraid eanet iežaset klubba ja klubba sisdollui.

Mii áigut fállat borramuša nuoraidklubbas. Mii diehtit ahte borramuš lea doaibmabidju mii čohkke nuoraid. Dán fálaldaga mii háliidit addit min nuoraide máŋgii mánotbajis. Mii guoská biebmogálvvuide, de áigut giddet fuopmášumi dearvvašlaš ja lagas árbevirolaš borramuššii ja áinnas ovttasbarggus gieldda vuođđoealáhusaiguin. Mii háliidit maid eastadit oktonasvuođa ja ovddidit gieldda nuoraid bures loaktima.

Duogáš

Báhcavuona nuoraiddiehtoguorahallama ja vásihusaid vuođul oaidná gielda ahte gárrenávnnasgeavaheapmi nuoraid gaskkas lea lassánan mealgat maŋimuš jagiid. Nuorat dadjet ieža ahte váillahit juoidá maid barggašedje maŋŋelgaskabeivviid. Mis lea rabas nuoraidklubba njeallje beaivvi vahkkui, ja mis leat buorit vejolašvuođat buoridit fálaldaga, ja dahkat dan eanet geasuheaddjin stuorát nuoraidjovkui go sii geat dábálaččat leat doppe. 

Buđaldeapmi

Mii háliidit geahččalit ođđa doaibmabijuid mat geasuhivčče nuoraid geat eai leat viššalat geavahit nuoraidklubba. Mii diehtit ahte ollugat čohkkájit ollu okto, ja mii geahččalit olahit sin. Dan lihkostuvvan dihtii mii háliidit viiddidit fálaldaga mii mis juo lea. Oktasaš gaskabeaivvit, leavssuid barganvejolašvuođat sidjiide geat háliidit, ja sosiála servvoštallan galget leat váldoáššit. Báhcavuona gielda áigu bargat váhnenrollain gárrenávnnaseastadanbarggus gielddas.

Mii leat maid bargamin oažžut čahraniid [báikkálaš joavkku mii bargá lagasbirrasa eahket- ja idjaoadjebasvuođa beales] doibmii. Mii oaidnit ahte gieldda guovddážis lea ollu ráfehisvuohta eahkedis vahkkoloahpaid, ja politiijat ja čielggus ollesolbmot viibet.

Maid mii háliidit olahit jagi 2027 rádjai?

Mii atnit buot dáid fálaldagaid eastadeaddjin. Juos gávdnojit doarvái buorit fálaldagat, maid nuorat háliidit geavahit, de eai geasuhuvvo gárrenbirrasiidda ja ruovttufeasttaide. Mis lea maid sierra nuoraidstivra klubbas, ja dat doaibmá deaŧalaš jietnaguoddin stivrajoavkku/bargojoavkku ja nuoraid gaskkas. Nuoraidráđđi galgá maiddái váldojuvvot mielde dain surggiide main lea lunddolaš sin geavahit.

Duogáš: 

Eastadit psykalaš buozalmasvuođa, ja addit mánáide, nuoraide ja váhnemiidda oadjebas ja buori mánáidgárde- ja skuvlaárgabeaivvi, ja veahki birget árgabeaivvis. Hámmárfeastta suohkan háliida lasihit ja heivehit váhnendoarjaga:  Váhnemat váldet oktavuođa bálvalusain go sis leat váttisvuođat nuoraiguin, ovdalgo álggahit eanet duođalaš doaibmabijuid.

Buđaldeapmi:

Bargojuvvo fáttáin “eallimis birget buorebut” skuvllain. Doaluid lágideami nuoraid ja oahpaheaddjiid várás bokte skuvla oažžu veahki buoridit ja čuovvolit fáttá oahppoplána olis. oahppoplánas. Dán fáttás oahpaheaddjit leat mánáide dehálaš ollesolbmot. Leat ráhkaduvvon smávva filmmat mat muitalit geainna sáhttá váldit oktavuođa jus ležžet jearaldagat loaktima birra mánáidgárddis ja skuvllas, vejolašvuođaid birra oažžut váhnenveahki jna.

• Diehtojuohkin Instagram ja TIK TOK bokte. Lasihit suohkana APP:a geavaheami mánáid ja nuoraid gaskka. 
• Deattuhit eambbo mo olahit ássiid, ja erenoamážit nuorat olbmuid-
• Fállat ovttageardán ja oanehis dieđuid suohkana ruovttusiidduin.
• Ásahuvvon psykologa bálvalus bajásšaddama, kultuvrra ja čálggu hárrái.  

Maid mii áigut olahit jagi 2027 rádjai?

Nannet doaibmabidjojoavkkuid mat fállet vuosttašceahkkebálvalusaid: bearrašiidda geat vásihit hástalusaid galgá leat álki váldit oktavuođa. Buorre visogovva oktavuohtadieđuiguin suohkana ruovttusiidduin lea mearrideaddji. Friddjaáiggearenat, doaimmat main mánát ja nuorat leat ulbmiljoavkun, olgoáibmokonsearttat, čoahkkananbáikkit buohkaid várás, birgejupmi fáddán ovttasbargoforumis ja fágasurggiid rastá.