Bargostipeanda: Govvadáiddárat ja dáiddaduojárat

Ođđa stipeandajuohkin lea 2021:s.

Ulbmil

Bargostipeandaortnega ulbmil lea golmma jagi badjel nannet Finnmárkku dáiddára vejolašvuođa vuoruhit barggu ovdánit iežas fágasuorggis.

Bargostipeanda

Bargostipeanda lea 100.000,- ruvnno juohke jahkái golmma jagi badjel. Bálká máksojuvvo guktii jahkái, vuosttaš ja nuppi jahkebeali.

Gáibádusat

Dáiddár ferte deavdit čuovvovaš oppalaš ja earenoamáš gáibádusaid:

Oppalaš

  • Dáiddár ferte leat orron ja bargan Finnmárkku fylkkas unnimustá golbma maŋemus jagi ovdal go stipeanda juhkkojuvvo, jus son lea fárren ruovttoluotta.
  • Dáiddár, guhte lea ožžon Stáhta dáiddastipeandda, ii sáhte oažžut fylkkagieldda bargostipeandda. Dáiddár, geas lea fylkkagieldda bargostipeanda ja áigodagas oažžu Stáhta dáiddastipeandda, massá dasto fylkkagieldda bargostipeandda. Dat juhkkojuvvo dasto ođđa dáiddárii.

Earenoamáš

Dáiddár ferte duođaštit čuovvovaš doaimmaid:

Čájáhusat
  • Golmma geardde ovddastuvvon Davvi-Norgga dáiddačájáhusas ja/dahje sullasaš nationála ja riikkaidgaskasaš čájáhusain.
  • Sierračájáhus Se Kunst i Nord-Norge:s (SKINN:s), Davvi-Norgga Dáiddárguovddážis, Davvi-Norgga Dáiddamuseas, Sámi Dáiddaguovddážis, Pikene på Broen dahje sullasaš eará báikkiin riikkas.
  • Golmma geardde ovddastuvvon fágajuryerejuvvon oktasaščájáhusas.
Čiŋaheapmi
  • Čiŋahandoaimmat mas lea nationála, fylkkagieldda dahje gieldda barggaheaddji almmolaš čiŋaheami dohkkehuvvon njuolggadusaid mielde.
Oastin
  • Nationálamusea dáidaga, arkitektuvrra ja hábmema várás, Davvi-Norgga dáiddamusea, Kulturráđđi dahje Sámedikki oastinlávdegoddi leat oastán dáidagiid.
Stipeanddat
  • Gelbbolašvuođaovddideaddji stipeanda Norgga govvadáiddáriid (NBK) ja Norgga dáiddaduojáriid (NK) stipeandalávdegotti evttohusa vuođul, dahje ožžon stipeandda Sámi Dáiddačehpiid Searvvi (SDS) stipeandačájáhusa vuođul.

Dasa lassin sáhttá árvvoštallojuvvot oažžut bargostipeandda relevánta doaimmaid vuođul. Bargostipeanda sáhttá juhkkojuvvot dáiddáriidda geat devdet oppalaš gáibádusaid ja unnimustá 3 dain 6 earenoamáš gáibádusas.

Juolludeapmi

Fylkkagieldda kultuvrra, álbmotdearvvašvuođa ja johtalusa váldolávdegoddi juohká bargostipeanda lávdegotti evttohusa vuođul. Lávdegottis galget leat:

  • sadjásaš kultur- ja birashoavda
  • Davvi-Norgga govvadáiddáriid (NNBK) nammadan govvadáiddár
  • Davvi-Norgga dáiddaduojáriid nammadan dáiddaduojár
  • Sámi Dáiddačehpiid Searvvi válljejuvvon dáiddár

Bargostipeandda galgá juohkit sihke govvadáiddáriidda ja dáiddaduojáriidda.
Bargostipeanda galgá juhkkojuvvojit vuoiggalaččat sohkabeliid gaskkas.

Almmuheapmi

Ortnet almmuhuvvo Davvi-Norgga dáiddaduojáriid, Davvi-Norgga govvadáiddáriid ja Sámi Dáiddačehpiid Searvvi neahttasiidduid bokte, ja Sámi Dáiddaguovddáža ja Davvi-Norgga dáiddárguovddáža diehtojuohkinkanálaid bokte.

Raporteren

Stipeandavuostáiváldi galgá čálalaččat raporteret bargostipeandaortnega mearkkašumis iežas ovdáneapmái ja doibmii golmmajagiáigodaga maŋemus jahkebeali.

Gávdnet go maid ledjet ohcamin?

Oktavuođaolmmoš

Kirsti Riesto
Seniorrådgiver
78 96 31 13
415 46 644