Kursa bistá 5 beaivvi ja ulbmil lea ahte sámegielat birrasis oahppat sámegiela.Kursa álggahuvvo geassemánu 28. beaivvi Guolleváddjis (Bearalvágis) ja loahpahuvvo Unjárggas suoidnemánu 2. beaivvi.

Lassin giellaoahpa de besset oasseváldit maid vásihit luossabivddu, reabbabivddu ja oahppat sámi báikenamaid ja duoji.   

Dássážii leat sullii 30 dieđihan iežaset dán kursii, sihke mánát ja ollesolbmot.

- Mii doaivut ahte giellalávgun movttidahttá oahppat eanet sámegiela ja ahte beroštupmi lassána sámegillii ja kultuvrii, lohká Marianne.

Giellaoahppa ii dárbbaš álo leat klássalanjas, ja heivege namuhit dan maid dovddus sámi girječálli celkkii;  

 "Muhto go sápmelaš lea alla váriid nalde, de sus lea oba čielggas jierbmi.  Ja jos doppe livččii čoakkánbáiki soames alla vári nalde, de veajálii sápmelaš čilget oba bures su ieža áššiid..." Juhan Turi

- Mii leat ovdal maid sirdán oahppolávddi lundui, ja das ledje hui buorit bohtosat, loahpaha Sverre Porsanger.

Giellalávgun lea oktasašprošeakta gaskal Finnmárkku fylkkagieldda, Isak Saba giellaguovddáža ja Deanu giellagátti.

Gulahallanolbmot:

Marianne Johnsen, marianne.johnsen@nesseby.kommune.no

Sverre Porsanger, sverre.porsanger@seg.deatnu.no

Elen R. Sara, elen.ragnhild.sara@ffk.no